Oosikola dhimwe moshitopolwa shaHardap odha lopotwa iizemo yoCovid-19 yi li 20 okuza momasiku 8 Febuluali nuumvo.
Sha ikolela kolopota ya li ya tumwa koombelewa oonene dhopashitopolwa dhelongo koHardap, osekundosikola Dr. Lemmer, oya ndhindhilikwa niizemo yi li pombanda.
“Omulongi gumwe posikola St. Joseph Primary oshowo omulongwa gumwe gokosikola Dr. Lemmer okwa li ya monika tango omukithi gwoCovid-19 momasiku sho ga li 08 Febuluali, nokuza esiku ndyoka omwaalu ogwa tameke okwiindjipala,” ontumwafo ndjika oya li ya shangwa okuzilila kombelewa yelongo osho ya ti ngaaka..
Okwa shangwa kutya maantu mboka ye li 20, ye li 11 ngashiingeyi oya kala nawa, omanga ye li omugoyi natango taya lumbu noCovid-19.
Ya ti, mboka ya monika omukithi ngoka oya ikalekelwa komagumbo, notaya tsikile okugwanitha po omalandulathano agehe gokwaatandeleka omukithi ngoka.
“Omikalo dhokukeelela omukithi ngoka odhi li metifa poosikola moshitopolwa moka, ngaashi okwiikala kokule, okuzala uumasika oshowo okwiiyoga koonyala ethimbo kehe,” ya ti ngaaka.
Uuministeli wuuhaku owa tameke okugandja omalongo kombinga yomukithi gwoCovid-19, opo kaagu taandele unene oshowo gu hule po thilu.
Okuza momasiku 19 sigo 23 Febuluali, okwa tegelelwa taku ka kala omaudhano koosikola dha yooloka, nodha kumagidhwa dhi landule omilandu adhihe dha tulwa po okukeelela omukithi gwoCovid-19 kaagu taandele.
Omukithi gwoCovid-19 ogwa ningi ethimbo gwa lota, konima sho gwa li gwa lwithwa nomikalo adhihe dhali dha longithwa.
Omimvo dha piti, omukithi ngoka okwa li gwa patitha oosikola, iilonga yilwe oshowo oositola sho kwa li tagu endelele okufaalela oomwenyo dhaantu.
Okuza esiku omukithi gwoCovid-19 gwa ponokele Namibia momumvo 2020, okwa ndhindhilikwa omukithi ngoka kwa li gwa kwata aantu ye li 172 266 nogwa faalele oomwenyo dhaantu ye li 4 103 omanga aantu ye li 167 099 ya li ya kala nawa.
--vkaapanda@nepc.com.na