WINDHOEK – Omwiimbi gwoongalo a tseyika nawa Ann Singer osho a pititha oalbuma ye ontiyali yi na oongalo 12. Okwa li a tameke okulonga noprojeka ndjika omumvo gwa za ko, nosha li she mu pula oomwedhi odhindji e li mostudio opo a gandje oongalo ndhoka dha dhoga nawa.

“Onda kala tandi longo iinima oyindji. Okukala omuvali, omunasikola osho wo okuimanenga ngame mwene, onda kala wo noku itsa omukumo, osha li ondjila onde,” ta ti ngaaka. Omumvo gwa za ko okwa kala i ipyakidhila, okwa li a tuka a ya kondje yomafuta hoka a li a ka imba koAzerbaijan menenevi Europe nokoNairobi a ka ya koshigongiilonga shoACCESS, osho wo okukwatitha oongalo dhe moalbuma ye ndjika yedhina Sanity.

 Nuumvo, sho a li i ipyakidhila noonkondo, okwa li a dhengwa konkalo yomwenyo omwiinayi shoka sha li she mu fala sigo oponkatu i itete omuthipa nokambi. “Onda li ndi li moshokondeka shiinima oyindji nosha li sha teya ndje po. Kanda li nda pula ekwatho ashike onda sindana. Kashi shi oshinima tandi shi halele nando omutondi gwandje nondi uvite uuntsa kutya nena ongame nguka tandi vulu okugandja ehokololo lyolweendo lwandje nayakwetu,” ta tumbula ngaaka.

Omwiimbi nguka a sindana wo omapapa okwa li a topoka nehangano lyoongalo lyaSouth Africa Mabala Noise sho okontalaka ye ya li ye ya pehulilo. Okukala wa shainwa kehangano enene ngaaka otashi patulula oondjila dhoye. Itandi dhimbwa sho nda li nda ka imba koDurban mo2017,” ta fatulula ngaaka.
Ngashiingeyi ke li kehangano lyoongalo, noku uvite uugumbo okukala ponkatu ndjika molweendo lwe lwoongalo. Okwa li a longo pamwe naahikingalo ya za moNamibia, South Africa osho wo Zimbabwe.

Omikwelengendjo moalbuma Sanity odha li dha ningwa kuGl, Joe Kay naJaleel.
 Okwa li a kwashilipaleke aayambidhidhi ye kutya oalbuma oyi na okukala ya nambela moshilongo okuza koSouth Africa oshiwike tashi ya.