Lasarus Hakwaake

EENHANA – “Dumingu okwa ninga oshinima ina shi ningwa mo nande onale momukunda wavo, okwa yandja oshiholelwa shii, nokwa nyateka edina lomukunda wavo”.

Edi eendjovo da popiwa kovakalimo vomomukunda Omutwewondjaba moshitukulwa shaHangwena pefimbo vali tava yandje omukandanyenyeto wavo molwa edipao lomukainhu womomukunda wavo. 
Omafiku kemale eshi Shiningeni Dumingu womomukunda Omutwewondjaba a tetaula shinyanyalifa omukukadi Lucia Alfredu oshoyo suwala shaye oo a li ta kendabala a kale ngeno a amena mumwaina. 

Dumingu okwa teta omukulukadi waye nokuhe na onghenda, e mu tetaula komutwe, komaoko ndele nominwe dimwe dokeenyala okwe di teta ko nekatana. Oshiningwanima eshi osha ningwa konima yomwedi eshi omukulukadi wa dumingu kwa li a fiya po eumbo lavo lohombo nokushuna keumbo laxe omolwa omahepeko itaa nuwa omeva oo a kala ta ningilwa komushamane waye. Otaku hokololwa kutya Dumingu okwa hangika ashike a pewa elombwelo keemwiya daShinana eshi kwa li natango a ya kooxemweno nokukufa ko oinima imwe yomukulukadi oyo kwa li a lomwbwelwa kopolifi a kale ei shuna ko manga ina katukilwa onghatu ya kwata moiti. 

Ashike ponhele yoku li ufa komalombwelo opolifi, Dumingu okwa vati okwa tanganeka omutwe, ndele taka longa nee oilonga ei yomilaulu yashiya ko. Konima eshi a longa oilonga ei yoixuna okwe li yandja mwene kopolifi yEenhana. Okwa holoka nale momangu yEenhana oshikando shotete nokwa anyenwa eindilo loku lifutila mo. Otaka holoka vali momangu oshikando oshitivali momafiku 27 Juni 2019.

Ashike eshi inashi fiya ovakwashiwana vomomukunda Omutwewondjaba omutumba ovo va ninga omunyanyo okudja komukunda wavo fiyo okomhangu mEenhana tava pula Dumingu a kale ina pewa oufemba woku lifutilamo. Otava popi kutya ova tilifwa unene koshiningwanima noka ve uditile ombili omolwa onghalo yomahepeko oomeme nounona. Otava popi kutya Dumingu okwa ninga oshinima inashi ningwa mo nande onale momukunda wavo, okwa yandja oshiholelwa shii, nokwa nyateka edina lomukunda wavo. Otava ti Dumingu na kale modolongo shaashi oshiwana okwe shi tula moutile, vamwepo movovakwanedimo vaDumingu navo ova indila Dumingu a kalekwe mokakuma. Ovakwashiwana otava ti   eemhango depangelo odaheva sho osho shi li oshidjemo shomahepeko oo ta ningilwa omeme nounona efiku nefiku.
Ova popya yo kutya ovapolifi ova pumbwa okukala tava nyamukula pefimbo nomanga ominyonena ditalala, otava ti oto hange omunhu a ningilwa omatilifo ongula, nakuninga omatilifo ta mangwa po, ndele konima yeevili donhumba omunhu okwa mangululwa. Omatokolo aheva oo taa eta ovanhu va hepekwe kovalumenhu ovo ngeno vena oku kala tava amene omeme nounona. Otava ti nande omunhu oku na oufemba woku li futila oboloxa, otava indile oifuta ei ikale ya nyaya komunhu opo veshi tulifwepo. Otava ti Dumingu ngeenge ota pewa oufemba woku lifutila oboloxa nayi kale i fike N$500 000-00 nongenge okwa pewa ehandukilo nali kale eedula efele mokakuma. Omukulukadi ota mono ouhaku moshipangelo sha Shakati eli monghalo idjuu.

Omukandanyenyeto owa tambulwako kuSililo Mwala omukalelipo omukulunhu wepangelo paveta momangulilo yaEenhana, okwa udanekela oshiwana kutya omangulilo otai ka fiya nande emanya la londa ku likwao moshinima eshi,  kokutya ouyuuki otau ka kalekwa po. Okwa weda ko yoo kutya oshi udifa nayi unene ngeenge ovalumenhu ava ngeno vena oku kalekapo eameno loomeme nounona ovo vali tava hepeke ovanhu.