SWAKOPMUND –Omukainhu moSwakopmund okwa fya e limangeleka nongodi yolusheno konima eshi a kendabala okutwa omusamane waye nombele. Manga eshi inashi ningwa, omukainhu ou vati tete okwa lombwela mwene kutya ota hengana.

Oshiningwanima eshi osha ningwa onguloshi yOsoondaxa molukanda laMahetago.  
Nakufya a didilikwa kutya oye omunamido 30 Victoria Hedelina Angustus, vati okwa hangwa mokandjuwo a endjelela mongodi yolusheno kusuala shaye, mumwaina womusamane waye. 

Omukwatakanifi momakonaakono oimbuluma mErongo, Deputy Commissioner Erastus Iikuyu okwa ti, Augustus okwe ya meumbo lwopotundi 15h00 a dja kolukanda laDRC, nokulombwela omusamane kutya ota hengana. 

Omukulukadi ou vati okwa tameka okulongela oinima yaye, mwa kwatelwa oshiyaxa shimwe. Ashike omusamane vati eshi e mu lombwela ne shi fiye po, okwa kufa ombele yopepata a hala oku i mu twifa, ashike omusamane okwe mu dula eenghono ndele te i mu kufa. Omusamane okwa dja mo meni leumbo nombele oyo ndele ta ka kala omutumba pondje yeumbo.

Lwopo 18h30, omusamane vati okwa shuna meumbo ashike okwa hanga omukainhu e li patela mokandjuwo oko ke li monduda yavo yokunangala. Eshi a ifana omukulukadi waye vati ine mu nyamukula, okwa dengela mumwainakadona wanakufya ndele te mu hokololele osho sha li tashi linyenge meumbo lavo. 
Konima yokafimbo, mumwaina kadona womulumenhu okwa ke uya mo meumbo ve li nomulumenhu waye, tava teya po omuvelo wokandjuo noku litwa nee suala shaye e limangelekela mokatenda kokuleka oihaduku moshiikoshelo.  

Iikuyu ta ti Augustus ina fiya po okambaapila kasha, nopolifi itai fekele nande kutya pamwe opena oulingilingi wa  longwa po mefyo omo. Ashike okwa ti omakonaakono omudimba otaa ningwa oshivike eshi opo ku talike kutya osheetifi shefyo oshike.