Minista wounamapya, omeva nomatululilo omadu Calle Schlettwein okwa ti ouminiteli waye otau twikile nokuandjaneka omeva komikunda molwashi omeva okwa fimana konghalamwenyo yomunhu keshe.
Edi minista okwe di popya oshivike sha dja ko koodolopa yaPuwo kefiku ledimbuluko lomeva mounyuni.
Okwa ti ombelewa yaye otai kwashipaleke kutya oshiwana moshitukulwa shaKunene oshi na omeva a yela.
Okwa ti ope na eepolongalama dihapu da tulwa moilonga okuyandjaneka eembola domeva moshitukulwa shaKunene.
Okwa ti omeva ohaa longifwa pa mikalo da yooloka ngaashi moikunino younamapya, meengeshefa noshoyo koimuna.
Onghee okwa ti omeva otaa twikile nokudana onghandangala ya kula mokuhambula po eliko loshilongo.
Okwa ti ngeenge pe na omeva otashi yandje omhito koshiwana okutotapo oikunino younamapya nokonima otashi pitike oshiwana shi landifa oikunomwa yavo.
“Omeva otaa lwifa ondjala noluhepo unene tuu ngeenge taa longifwa koshikondo shounamapya.
Onghee ngeenge ka pena omeva omunhu ita dulu okukala ta nwefa oimuna yaye ile ta tekele moshikunino shaye,” ta ti.
Okwa ti oshiwana na shi kaleke po efimano lomeva tashi pitile mokulongifa nawa omeva nokulikaleka kokule nokuteya po eembola domeva.