OSHAKATI- Minista womangeshefelo Lucia Iipumbu okwa ti ouministeli wavo itau ka yambidida eengeshefa ngeenge inadi ningilwa omapekapeko kovanambelewa va dja kouministeli wavo.

Iipumbu okwa ti omanga inau yandja omakwafo omashina nokwanoipangifo ikwao ya pumbiwa keengeshefa, ouministeli otau ka ninga omapekapeko oku tala ngeenge nakuninga eindilo oku na tuu ongeshefa shi li noshoyo okuningilwa omapulapulo kombinga ya shi ta ka longifa omashina oo.

Edi Iipumbu okwe di popya onghela pefimbo a ninga omutumba novanangeshefa vopedu mOshakati.

Ovanangeshefa vo pedu va dja koikandjohoololo ya yooloka moshitukulwa shaShana okwa li va ngudumana nelalakano lokupewa ouyelele kombinga yomakwafo haa pewa eengeshefa koministeli woipindi.

“Otwa didilika ovanhu vamwe ngeenge ova pewa omashina ihave a longifa pamukalo muwa, omanga ovanhu vamwe ohave a pungula momaumbo itaa longo sha,” Iipumbu ta ti.

Okwa kumaida ovanangeshefa vopedu hava mono omakwafo oilongifo kouminiteli wavo opo va longife nawa oilongifo ha pewa.

Minista okwa holola yoo ehafo laye molwa ovanangeshefa va pewa omashina okuhondja kouministeli, ndele tave a longifa pamukalo muwa.

Iipumbu okwa weda po ta ti ovanhu va pewa omashina okuhondja ile omashina okulonga oilandifomwa ya yooloka ova eta po eemhito doilonga shaashi ova kuta ovanhu vakwao meengeshefa davo.

Moshipopiwa shaye ngoloneya moshitukulwa shaShana Elia Irimari okwa ti  omutumba ou owa fimana shaashi otau yandje ehongo kovanangeshefa.

fhamalwa@nepc.com.na 

Oipindi… Minista woipindi neefaabulika Lucia Iipumbu  Efano: Festus Hamalwa