ONGWEDIVA- Ondjala oshoyo oshikukuta sheli hanena oshilongo oya etifa eengobe moshitukulwa shaMusati unene mOutapi, opo di tembukile modoolopa.

Ephraim Gideon mwene womukunda Oshima uli moshikandjohoololo shaUtapi okwa ti odoolopa yavo oyeli hanena eengobe noikombo tadi di pomikunda pepi. Ta ti oimuna otai nyange momandoloma oimbodi, yoo imwe otai kongo oipakete, ashike oipakete nayo paife oya pumba mo modoolopa.

“Oha tupapala ashike oimuna yetu tai fi shaashi paife eshi oipakete yapumba modoolopa, oimuna ohai li haluka tai li eenailona,” Gideon ta ti.

Ta ti eshi tashi udifa nai, oimuna shima ye ya pokanala komeva ndele tainu ohai kala ashike ofika yataalela kopate yafa ihe wete apa ta yii shaashi kape na omwiidi.

Va ti ngeno kapali omeva omokaanala ngeno moMusati itamu tokwa nande oshimuna shimwe.

Vamwe vomOutapi ova ti ovali ve na eengobe diwa diwa komalutu vedi landele ondilo ndele paife ove wete kutya oimaliwa yavo oili pokuya momeva.

Ova tumbula kutya paife ava veli mo nawa ovava ashike va nyangadala shaashi ohava dulu okulandela oimuna yavo oikulya. Ngoloneya woshitukulwa Erginus Endjala okwa udaneka kutya epangelo ota li ka yandja oshikukuta shopashiwana okudja mefiku 1 Kotoba 2023.  “Oikulya ei oya nuninwa ovanhu oshoyo oimuna. Onda pula yoo ookansela voikandjohoololo va tameke okushanga omaumbo a mona oixuna koshikukuta opo a dule okuvatelwa,” Endjala ta ti.

taimihaihambo2000@gmail.com