Festus Hamalwa

Ovafitaongalo keengeleka da yooloka monooli ova hokolola tava ti ongeleka nayo oya dengwa kefundja eshi paife oyuuyemo ya shuna pedu molwoilyo oyo itai dulu okufika nawa.

Ova ti eendjila odo hadi endwa kovanhu odi li koshi yomeva naashi osha eta opo omwaalu wovanhu hava i kongeleka u kale wa shuna pedu shaashi ovanhu ova tila okuninga oihakanwa yokuwila momeva.

Meenghundafana va ninga naKundana omufitaongalo wongeleka St Mary kOdibo Anna Nghifitikeko okwa hokolola ta ti kongeleka yavo ihaku kala vali ovanhu ve li momwaalu muhapu shaashi eendjila oda fitikwa komeva.

Okwa ti ovanhu ashike ovo hava di popepi nongeleka hava i Kelongelokalunga shaashi ihava ende momeva.

Okwa yelifa ta ti mOdibo omu na ongeleka yavo oyo imwe ya dengwa kefundja shaashi omeva okwa pita momukunda wavo a yuka komikunda ngaashi Onengali nOkatope.

Nghifitikeko okwa ti ovakulunhu ovo unene hava kala vahapu mongeleka mokufaafanifa novanyasha onghee paife oshi li eshongo linene eshi ku na efundja shaashi itava dulu vali okutauluka omeva.

“Kape na omunhu a hala okuya kongeleka noikutu ya tuta ngeenge a tauluka momeva. Ovanhu ova tila okuninga oihakanwa yokufila momeva ile yokulika komayoka shaashi omeva efundja okwa nyika oshiponga,” ta ti.

Omufitaongalo wengeleka Anglican mOngwediva Taarah Shalyefu naye okwa hokolola ta ti kongeleka yavo ohaku kala ashike ovanhu ve li momwaalu mushona molwefundja.

Shalyefu okwa ti omikunda dihapu da dingonoka Ongwediva hadi di ovakwaneongalo oda dengwa kefundja onghee paife osha ninga shidjuu okukala va fika kongeleka.

Okwa weda po ta ti ihava twikile vali noinyangadalwa yavo hai ningwa mongeleka shaashi omwaalu wovanhu owa ninga ushona.

fhamalwa@nepc.com.na