Harry Simon Junior ota ka taalela enyakwa lyoWorld Boxing Association Africa noInternational Boxing Federation International Walterweight Jabulani Makhense momasiku 21 Maalitsa moSouth Africa. Omunamibia nguka ota ka taalela Makhense, moka taya ka kondjela omapaya ngaka gaali, muudhano mboka wa talika ko uunene tawu ka dhanenwa moEmperor’s Palace.
Omushangwa gwa pewa oshikundaneki shoNampa mEtiyali ogwa ti Simon Jr ota ka ikongela edhina kuye mwene, a landula moompadhi dhahe nota ka ninga wo ondjokonona kuye mwene ngele okwa dhenge Makhense, ngoka inaa dhengwa sigo opaife muudhano we wu li omugoyi.
“Makhense okwa talika ko onga omudhengingonyo omwaanawa moSouth Africa nokwa sindana omalugodhi ta fuula,” omushangwa tagu ti ngaaka. Tagu ti wo Simon Jr naye ina dhengwa sigo oompaka momaudhano ge 11, moka muudhano omugoyi a dhenga yimwe nomiiyagaya.
Omudheuli gwe Nestor Tobias okwa ti ngele okwa dhenge Makhense nena Simon Jr ota ka kala ponkatu ombwaanawa.
“Ndjika ompito onene a ikongele edhina. Ota ka taalela omudhengingoyo a kukuta moshilongo shawo, ashike ondi na omukumo kutya ota ka za po nesindano, itashi ka kala oshipu ashike okwa valwa enyakwa,” Tobias ta ti ngaaka.
Smon naye okwa li wo a popi kutya ndjika ompito e yi panda.
“Ondi shi kutya nduka olugodhi olunene molweendo lwandje, ashike onda ilongekidha nawa…Otandi ka eta omapaya ngaka gaali kegumbo nokukala enyakwa,” ta ti ngaaka.
- Nampa