ONGWEDIVA- Omulumenhu omunamido 53 okwe li hanga e na ouyehame itau veluka, noku li kepango loudu wopamadilaadilo sha landula eshi a yashelwe neeholo domakenya pefimbo lekangha olo la li la unganekwa kuNafau. 

Gabriel Haihambo ota hokolola kutya okwa monifilwe oshiponga komutwe eshi a yashwa kopolifi pefimbo lomunyanyo wekangha lovanailonga voShoprite mo2022.

Haihambo ta hokolola kutya ye okwali umwe womovanailonga vaShoprite poYetu, ovo va li va kufa ombinga momunyanyo wopambili, kwali tava pula opo eendjabi davo di wedelwe.

Ta ti omunyanyo oo owa li mewiliko lehangano lovanailonga loNafau.

Pefimbo loshiningwanima, va ti ova umbwa kopolifi oyo yeva yasha neeholo domakenya “ruber bullets” oyo imwe yomudo vati ye mu yasha kekofi ndele tai mu monifa oshiponga.

Haihambo okwa twalwa koshipangelo shaShakati ashike vati fiyo onena ouheyame onghee ngaho tau pula komesho.

“Onda ka papala ashike eshi handi kwatwa ketelele ombaadilila ame shima nda mono omupolifi ile omunhu ekwete ondjebo ohandi kwatwa koumbada. 

Eshi osha etela nge opo ndi tulwe komiti dovanhu vena oupyakadi wopamadilaadilo ashike ame mwene kandi wete handi ehama momutwe,” Haihambo ta tumbula.

Okwa ti okwa kendebala aye koipangelo yopaumwene yee ngeno Nafau ta futu ashike ehangano ola futa ashike oshikando shotete. 

Haihambo okwa ti koshipangelo shopuamwene shaMedi park okwashangelwa ko omakonaakono taa pula oN$11500. “Nafau eshi nde mu tumina ombaapila yomafutilo, fiyo onena inava alukila nge. 

Ohandi lombwelwa ashike kutya onda futilwa nale oN$1000,” Haihambo ta hokolola.

Hamushanga waNafau Jacob Penda ina nyamukulwa komapulo aKundana, eshi a pulwa okwa dimana omutoolinghundana ou ongodi.

taimihaihambo2000@gmail.com