Omupopilkiko woshilando shaWindhoek Harold Akwenye okwa kunghulila oshiwana opo shi xulife po okukala tashi andjaneke olusheno momaumbo avo tashi longifa omukalo woumbudi.
Okwa ti kukeshe omunhu ta ka monika e na olusheno la tulwa meumbo laye paumbudi ota ka pewa a fute oshimaliwa shehandukilo ile a pewe eedula modolongo. Akwenye okwa hokolola ta ti osha nyika oshiponga ngeenge oshiwana tashi longifa eengodi dolusheno okutula momaumbo avo shaashi ohashi dulu okueta oshiponga shefyo.
Okwa ti unene ovakalimo ve li komalukanda moWindhoek ovo unene va didilikwa hava kendabala okukala tava andjakaneke olusheno eshi hava kala tava kwatafana eengodi dolusheno vau kifa maumbo avo.
Akwenye okwa lombwela Kundana Etitatu ta ti oshiwana nashi kale tashi lopotele ombelewa yelelo lamuni waWindhoek ile opolifi ngeenge va mono omunhu ta tula olusheno meumbo laye shihe li papitikilo lamuni.
“Out na ovapolifi vomoshilando hava kala tava patolola komalukanda opo va dule okukwatwa po ovanhu tava longifa oulingilingi wokuvaka olusheno,” Akwenye ta ti.
Okwa kunghulila yoo oshiwana opo shi kale sha ta kamifa eengodi dolusheno pefimbo eli lodula ili metifa shaashi okwa didilikwa eengodi dimwe dolusheno komalukanda hadi kala ashike ta enda meendjila hamu endwa koshiwana.
Onghee okwa ti osha nyika oshiponga ngeenge omunhu okwa lyata ongodi yolusheno shaashi oshidulu okueta efyo.
Akwenye okwa weda po yoo vali ta ti muni waWindhoek onghee ngaa ta twikile nokuwapeleka omilambo komalukanda opo omeva a kale taa kunguluka noupu nokukelela eebashu dovakalimo di ha kale koshi yomeva.
“Oshiwana nashi kale tashi lopotele ombelewa yetu oinima aishe ya nyika oulingilingi ngaashi okuteya po eepomba domeva nosho tuu oikwafo ya muni ya yooloka yomoshilando,” Akwenye ta ti.