OSHAKATI - Aanangeshefa aashona mboka haya eta po iilandithomwa yawo noonyala oya ti, ngeno okwa li haya yambidhidhathana pamukalo gomangeshefelo, ngeno oyendji aazeko, nuupyakadhi wokwaa na iilonga moshilongo ngeno owa shonopala.

Aveline Dumingu ngoka ha eta po iilongithomwa ya yooloka ngaashi omashungu, iikwatelomwa niiyala okuza momwiidhi gongushu tagu ithanwa ‘ompungu’ okwa ti, nonando shoka ha mono okuza mongeshefa itashi gwanitha po ayihe a hala, oshi vulethe owala.

Omunangeshefa nguka omushona okwa ti okwa ninga omimvo odhindji ha landitha. 

Ta ti, oha ende noondoolopa dha yooloka ta kongo aalandi.

Dumingo oshiwike sha zi ko okwa li ta landithile moondoolopa dhokonooli ngaashi mOshakati, Ongwediva nOndangwa, ta ti, ke na ehala lyokulandithila, ihe oha kuutumba ashike kehe mpoka e wete pe na ombepo tayi pepe nawa.

“Ohandi landitha omashungu giikutu ga kola nawa, oshowo iikwateli niiyala, mbyoka handi ningi noonyala dhandje. 

Iinima ayihe mbyoka ohandi yi longo nomwiidhi ngoka gwa kola tagu ithanwa ompungu, handi gu kutha kOmaruru,” ta fatula ngaaka.

Ta ti, iilandithomwa ye oyi na ondando okuza N$200 sigo N$350, ihe kasitoma ngele okwa ti ina gwanitha ondando ndjoka te pula, ohatu vulu okupopya e tatu kutha ko kashona kondando.

Ta gwedha po ta ti ookasitoma ihadhi tokwa lwaali, ngele owe dhi etha omanga tadhi ti odhi na po shoka dhi na po, nena ito ke dhi mona we. Nenge oto ka mona ashike to zimbuka inoo landitha sha.

“Sho nde ya mOshakati, onda zi koondoolopa dhokuuzilo, hoka nda longo ko ngaa sha gwana, nonando hasho shokuzimbula ndje. 

Onde ya huka ndi palaapale po ishiwe,” ta popi ngaaka.

Dumingu okwa ti, ke na nando uupyakadhi okuningila kasitoma shoka a hala hashi vulu okweetwa po nomwiidhi ngoka ha longitha.

Ta popi ta ti kape na oshinima hashi ya po nuupu, ihe okukondja okuvule okumwena.

“Otandi kumagidha kehe ngoka e na uunongo nenge oshitalendi shontumba, opo eshi longithe, shi vulithe oku ka longela ehangano lyontumba,” ta kumagidha ngaaka” 

Ta ti, oshimaliwa shakehe siku oshitoye, shi vulithe shokomwedhi oshoka kehe ethimbo otashi toka ashike.

Dumingu okwa ti, aanyasha naya thikame nena, omanga ye na ethimbo lya gwana, ya tameke okunyangadhala nakehe shoka opo ya mone sha shokulanda omboloto.