Engela - Ovalandifi voukuki neeshi hava landifile popepi noshipangelo shaNgela ova holola nghee va hala okudimbulukiwa kelelodoolopa yaHelao Nafidi.
Ovalandifi ova hokolola kutya ova ninga efimbo lile vehe na omatala okulandifila, nova hala omalandifilo e li xwepo.
Omulandifi umwe a pula edina laye liha tumbulwe okwa hokolola kutya ohava mono oixuna komutenya, omhepo, ondwi oshoyo odula.
Okwa ti kutya vahapu vomuvo ova kala hava landifa oukuki neeshi eedula dihapu komesho yoshipangelo va ningila ovanaudu shaashi oilandifomwa yavo oi na ombilixa okuyelakanifa noukefe voikulya vakwao va kalela oshipangelo.
“Eshi opo twa tameke okulandifa otwa li hatu landifile pokamwandi konhumba ka taalela oshipangelo, nokonima otwa ka kufwa po shaashi otu li ponhele yovanhu yoshipangelo vati. Konima eshi twa tewatewa otwa ka pewa onhele i li natango popepi noshipangelo ashike kape na nande omudile washa,” umwe womuvo ta ti.
Omulandifi okwa twikila kutya shaashi voo ponhele apa va ke lihanga kape na nande omudile wonhumba, ova pangela okueta po outala va ningwa momalapi opo ve liamene komutenya, ashike osho natango ihashi va amene, kave na ashike nghee. Oikulya ei vati hava landifa onghee ngoo hai uhala tai mono oixuna komutenya osho yo kondwi yomahauto aa haa kala taa tondoka popate.
“Pefimbo lodula natango ihatu dulu okulandifa shaashi omalandifilo ohaa kala ashike e yadi omeva. Onghalo ya tya ngaha ohai fiye ovanaudu ava ve ya koshipangelo nondjala, voo haaveshe tava dulu okulanda oikulya yomokefe yoshipangelo,” umwe womuvo ta ti.
“Fyee otwa ninga onghendabala yokuya kuHelao Nafidi opo ve tu kwafele ve tu ningile onghendabala yoku tu tungila omatala, ndele ove tu lombwela tu konge onhele apa hatu dulu okulandifila, oyo tuhe na apa hatu hange,” omulandifi umwe ta ti.
Omukwashiwana umwe oo a pulwa naye aha tumbulwe kedina okwa yelifa kutya onghalo yovalandifi ve li popepi noshipangelo inai nyika nawa oukoshoki shaashi ohava kala ashike ve li koshi yondwi efimbo alishe. Okwa twikila kutya ongudu yovalandi vavo vahapu ovanaudu nohave lihange ashike tava lande oinima inai nyika lela oukoshoki voo otava vele nale.
Omupopiliko wodoolopa yaHelao Nafidi Selma Kapembe okwa yelifa kutya elelodoolopa ola kendabala okukongela ovalandifi onhele yokulandifila ndele inava mona. “Otwa kendabala okulombwela ovalandifi va konge onhele apa tava mono shee tu i lande po opo tu dule oku va tungila omatala e li xwepo okulandifa. Elelodoolopa kali na onhele tai dulu okalandifilwa i li mEngela,” Kapembe ta ti.
Efano: Taimi Haihambo