Ouministeli wonamapya, edu nomakuti owa kufa po eendjidjikila dokupitifa oilya tai di moAngola tai pitili keengamba daShikango.
Edi oda popiwa momukandapitifi wa dja mombelewa yomukulunhuwiliki mouministeli wounamapya, Ndiyakupi Nghituwamata Omaandaxa.
Nghituwamata okwa ti ei omhito iwa koshiwana opo shi kale sha landifa omahangu okudilila moAngola.
Okwa ti ouministeli owa didilika onghalo yoshikukuta sha denga Ovanamibia neudo shaashi ovanhu vahapu inava likola sha momapya avo.
Okwa weda po ta ti oshiwana otashi ka pitikwa yoo vali okulandifa omakunde.
“Ovanangeshefa vashona ova pitikwa okulandifa eeshako dee-KG 50 momwedi keshe omanga ovanangeshefa vakula ova pitikwa okulandifa eeshako 10 deKG 50 omwedi keshe,” ta ti.
Onghee okwa kumaida oshiwana opo shi liufe komilandu da tulwa po dokulandifa oilya.
Okwa ti oilya otai ka landifwa ashike pefimbo leengamba da patuluka onghee kepe na oilya tai ka landifwa tai pitile koshi yodalate shaashi oilya oya pumbwa okuningilwa omakonakono tete.
“Oshiwana nashi kwatafane neembelewa detu koitukulwa opo shi dule okumona omikunda dokupita keengamba noilya,” ta ti.
Nghituwamata owa kumaida yoo vali oshiwana opo shi kwashipaleke kutya oilya kai na omadu, inai tukwa koupuka yoo nai kale yoneudo.