“Otandi indile oongeleka ndhoka dha hala okukutha ombinga dhi dhenge oongendjo dhadho potundi 12h00 esiku ndyoka. Omumbiishofi Sageus /Keib ote ke tu kwatela komeho nomagalikano ga nuninwa oshilongo ashihe okuza megumbo lyepangelo. Aanamibia mboka ya hala okukutha ombinga naya hangane meyitaalo, naya ifupupike yo ya galikanene egameno nuuwanawa woshilongo.” 
– Presidente Hage Geingob

Presidente Hage Geingob mOmaandaha okwa li a ti epangelo olya pewa oshimaliwa shi thike poomiliona N$36 moshiketha shoNational Disaster Fund okukondjitha  omukithi gwoCovid-19 ngoka tagu endelele gwa fa epeya muuyuni. Geingob ngoka a li ta popi niikundaneki, okwa ti opo ku kolekwe ompito yoshilongo yokuninga omakonaakono gokukondjitha omukithi nguka, otapu kongwa omukalo goku eta moshilongo iikwa niipangitho yokuninga uututsu osho ku yokukondjitha omukithi nguka.
“Otandi indile Aanamibia ayehe opo ya longele kumwe nepangelo. Omukithi nguka kagu na esimaneko na ihagu tala kolwaala lwoshipa, uukwamuhoko nenge konkalo yoye. Otatu vulu ashike okusinda Covid-19 ngele twa hangana,” Geingob ta tsu omuthindo ngaaka.
Omupresidente okwa li wo a pula aakelesiti naaitaali opo yi ikalekele Etitatu onga esiku lyowina lyomagalikano moshilongo ashihe.
“Otandi indile oongeleka ndhoka dha hala okukutha ombinga dhi dhenge oongendjo dhadho potundi 12h00 esiku ndyoka. Omumbiishofi Sageus /Keib ote ke tu kwatela komeho nomagalikano ga nuninwa oshilongo ashihe okuza megumbo lyepangelo. Aanamibia mboka ya hala okukutha ombinga naya hangane meyitaalo, naya ifupupike yo ya galikanene egameno nuuwanawa woshilongo,” Geingob ta ti ngaaka.
Shi ikwatelela kupresidente, ehangano lyoDe Beers Group olya gandja oomiliona N$15 koshiketha shokulwitha omukithi nguka gwoCoronavirus, omanga DebMarine a gandja omashina 20 ge na ongushu dhooN$9.9. 
Old Mutual okwa li a gandja iikwa niipangitho yongushu yoomilina N$5, Social Security oya li ya gandja ootenga dhomeya komalukanda ge na ongushu yoomiliona N$3,3.
“Natu tsikileni okumanga uukuni kumwe mombepo yoHarambee,” Presidente ta hulitha ngaaka.
– Nampa