Namibia okwa landula iilongo iikwawo okudhimbulukwa esiku lyoradio muuyuni ndyoka hali dhimbulukwa omuvo kehe momasiku 13 Febuluali.

Esiku lyoradio nuumvo ota li dhimbulukiwa kohi yoshipalanyolo  ‘’omimvo odhindji dha piti tayi tseyitha, tayi nyanyudha oshowo tayi gandja omalongo.”

Epangelo lyaNamibia olya pititha omushangwa kutya esiku ndika otali dhimbulukiwa omolwesimano lyoradio sho ya kala nokugandja omalongo, okutseyithila oshigwana shoka shi na okuuva.

“Sho tatu ndhimbulukwa esiku lyoradio, out shi okupandula iilonga ya longwa koradio sigo opethimbo ndika, notatu tsikile okwiikolelela kuyo,” omushangwa gwa lesha ngaaka.

Ogwa kumagidha wo oshigwana shi tsikile okulongitha oomukalo goradio okutaambathana omauyelele oshowo okutumbaleka mboka haya kwatakanitha oradio noshigwana.

Omupopi gwokoradio gwedhina Omulunga, Lucas Nambala a tseyika nawa “Dj Nambalakats” ngoka e na ontseyo yokupopya moradio omimvo 11, okwa fatulula kutya oradio oshilongitho shoka hashi andjaneke uuyelele tashi endelele moshigwana.

“Oradio ohayi ndungike momukalo gokugandja omalongo moshigwana. Oradio ohayi etele ndje enyanyu kaaku na we, oshoka ondi uvite kutya onda pwiikinwa koshigwana  oshindji,’’ ta popi ngaaka.

Nambalakats, omupopi goradio pyokoka nawa, okwa popi ta ti omanga inooya mombepo, owu na okukala aluhe wa longekidha shoka to ka tseyithila oshigwana opo waa ka pukithe omanga wu li mombepo oshowo wu gandje uuyelele wu li mondjila moshigwana sha pulakena.

Okwa popi wo kutya, oha ilongo oshindji okupitila maanawino mboka haya ithanwa ya gandje omalongo gontumba koradio.

“Olundji ohatu ithana aanawino koradio, ihatu kala tu na uuyelele awuhe, ihe ohatu ka tseya oshindji mokupulakena kuyo,” ta popi ngaaaka. 

Hellen Andreas a tseyika nawa ‘Nuutoye’ okwa ti okwa longa kooradio dha yooloka okuza mo2014.

“Oradio oya simana oshoka ohayi gandja uuyelele moshigwana pethimbo,” ta fatulula ngaaka. 

Ta ti, ekuthombinga lyaapulakeni ohali ya gwedhele ko konsteyo ye na oshoka oye shi shoka yo yaa shi.

Ta popi kutya oradio ohayi longithwa wo unene omolwongushu yawo, nomakuthikuthi gawo oga thika kiitopolwa oyindji yoshilongo.

Maria Kandenge omupulakeni gworadio, okwa popi ta ti, okwa simaneka oradio oshoka okuuva uuyelele koradio ihashi pula oshimaliwa nando oshasha.

“Oonzonkundaneki dhimwe ohadhi pula oshimaliwa, opo wu vule wu leshe nenge wu tale shoka tashi kundanekwa,” ta popi ngaaka.

-vkaapanda@nepc.com.na