Omagongo oshikunwa shopamuthigulwakalo. Shoka oshikunwa shimwe sha simanekwa moshilongo nosha talika ko onga shimwe shomomililo dhoshilongo.
Ethimbo ndika lyomagongo, olya simanekwa miitopolwa ayihe yomonooli, moka to adha oomeme ya ipyakadhila nokukola omagongo.
Maria Shikunde a yambukile mOmungwelume ngoka a li a adhika momuti gomugongo pooha dhopate, okwa li a fatulile oshifokundaneki shika nkene omagongo haga longekidhwa oshowo nkene haga nuwa. “Omagongo ohaga hangwa ashike koomeme, sigo onena inandi mona omulumetu ta kolo nenge a kalela oomeme taya kolo, nonando oye e na okuga nwa tango megumbo, “ ta popi ye ti imemeha.
Shikunde okwa ti omagongo ohaga kolwa nehinga lyoshikombo nenge lyonzi ndyoka ha li ithanwa oshikolo.
“Omagongo ihaga kolwa aantu ya kuutumba kiipundi, ihe ohaga kolwa aantu ya taandela mevi. Nkene twa kala out na esiku ndyoka hatu kundathana, okutameka okukola oshowo okuhogolola egumbo hoka taku ka kolelwa,” ta hokolola ngaaka.
Ta gwedha po ta ti, omagongo ohaga kolelwa mokahela okashona tango omanga inaaga ka pimpilwa mehela nenge moluho olunene.
“Uuna to longekidha omagongo, owu na okukala wa yeleka oonyola dhoye, oshoka oongongo ngele dha kolwa lwahugunina ohadhi thinwa opo omeya agehe ga ze mo,” ta fatulula ngaaka.
Sirka Natanael ngoka kwa li taya kolo pamwe omagongo esiku ndyoka okwa ti, moongongo ihamu zi ashike omagongo .
Ta hokololwa kutya omuti gwomugongo ogwa simana gu vule omiti odhindji paShiwambo omolwiiyimati yago.
Oongongo ndhoka hadhi zi komugongo, ohadhi longithwa iilonga oyindji, ashike mbi ya simana okugandja omagongo nonzowe.
“Omuti nguka ohagu kala wo uupuka hawu liwa kaantu nokutekula oondjuhwa niikwamawawa yilwe, niipatu yoongongo ohayi longithwa onga iikuni,” ta fatulula ngaaka. Ta popi ta ti, ongongo ngele dha ningi oonshunga, ohadhi tameke okuumba, ano tadhi zi komuti.
Shoka ohashi holoka okuza momwedhi nguka tuli gwaFebuluali sigo oMai.
Ta ti, oongongo ihadhi vundakanithwa noongongo dhomuti gumwe gwii ili, kehe oluho lomagongo oluna oshikunwa hashi zi komugongo gwasho.
Lucia Shekunyenge gwomomukunda Okahauyulu moshikandjohogololo shEngela okwa li a hokololele Kundana esimano lyomagongo.
Ta ti, Omagongo ohaga menekelwa ongula taga kolwa omagongo ohaga siikilwa miiyuma noshilapi kombanda, go taga tulwa mehala lya talala nawa.
Shekunyenge ta popi ta ti, omagongo ohaga kala mo omasiku gatatu nenge gane opo ga pye ga wape okunuwa.
Shekunyenge okwa ti, okukola omagongo ohaku gongaleke aantu, naamboka kakwa li haya popi, ohaya popithwa komagongo pamikalo dha yooloka.
“Pethimbo ndyoka oomeme taya kolo, ohaya kala ye na omahokololo. Olyo ethimbo oohapu dhimwe kakwa li wu dhi shi to dhi uvu. Nongele ino kotoka oohapu otadhi ka ninga po dhoye,” ta popi ngaaka.
Saima Naishidi ngoka kwa li ta kolo omagongo esiku ndyoka okwa ti, omagongo ohaga kala ge na oopelesenda dhomalovu 4 nenge 4.5.
“Pamuthigululwakalo, omagongo tango manga inaaga tamekwa okunuwa, ohaga falwa komukwaniilwa nenge kelenga enene. Omagongo ohaga vulu okupungulwa sigo omumvo tagu landula,” Naishindi ta ti ngaaka. Ta gwedha po ta ti, ohaku tiwa, ethimbo lyomagongo aantu ihaya pangulwa uuna ya yona oshoka kaye shi shoka taya ningi.
Aano oohapu dhopethimbo lyomagongo ihadhi landulwa.
Gumwe okwali a gwedha po ta ti, natango oongongo ohadhi ningi oshikunwa hashi ithanwa oshinwa, shoka hashi nuwa kaanona oshoka kashi na iikolitha yasha.
“Oongongo ohadhi tu pe natango omahuku ngoka haga ningi omagadhi goongongo. Ngame otandi kolo kuyele oshoka inandi hala ongongo dhi ninge omapu,” a gwedha po ngaaka.
– vkaapanda@nepc.com.na