Elelo lyondoolopa Outapi olya mana noproyeka yokwaandjaneka omeya oshowo okutunga elambo lyonyata koExtension 20.

Oproyeka ndjoka ya longwa uule woomwedhi ne, oya longitha oshimaliwa shi thike pomilliona N$1.6.

Mayola gwondoolopa yOutapi Selma Asino-Shaumbako okwa ti oshimaliwa shoka osha longithwa okugwanitha po omayakulo oshowo ehumokomeho lyondoondolopa.

Ta ti, omeya  oga andjanekelwa komahala ge li 55.

“Okweeta omawunawa ga tya ngaaka, oshinakugwanitha shelelo lyondoolopa yetu, okugwanitha po nokukwathela aakalimo yetu noompumbwe dhawo,” ta popi ngaaka.

Ta ti, shoka otashi humitha nokuyambula po ondoolopa yawo, omolwa omayakulo nomauwanawa ga etwa popepi.  Asino-Shaumbako ta ti, ondoolopa yOutapi otayi tsikile okukambadhala okugwanitha po omawuvaneko agehe ya ningi inaaga gwanithwa po natango. “Elalakano, okuhumitha komeho ondoloopa yetu osho wo okugwanitha po oompumbwe dhaakalimo yomondoolopa yetu, ya kale taya hupu nawa noye na onkalamwenyo yi li hwepo,” ta ti ngaaka.

Maria Kandjimbi ngoka e na ehala koextension 20 okwa ti, ota pandula elelo lyondoolopa lyawo, omolwomawuwanawa agehe tali longele oshigwana. “Ondin a ohokwe okupandula elelo lyondoolopa yetu oshoka olyetu longela omawuwanawa ogendji, unene okuza omimvo dha zi ko no tali tsikile okushininga,” ta ti ngaaka.

Ta ti, nali tsikile okulonga lyi itula mo, ta pandula nopeha lyaakalimo aakwawo.

-vkaapanda@nepc.com.na