ENGELA-Ovakainhu ve li humbata kEwalanda lokoshipangelo shaNgela itava nangala va li keembete kuhe na omatalashe molwashi paife ova yambididwa nomatalashe 70 kehangano loSANLAM Namibia.

Omatalashe oo a yandjwa oshivike sha dja ko oku li pongushu yoshimaliwa N$28927.43.

Ewalanda onhele i li popepi noshipangelo shaNgela hai kala ovakainhu veli momateelelo ngeenge ve li popepi nokupulumuna.

Hano ohali kwafela ovakainhu vaha ende vali eendjiladiledile ngeenge tava fetwa unene tuu ovakainhu hava di komakule.

Moshipopiwa shaye omukulunhuwiliki woshitayi shehangano loSANLAM mOndangwa, Lukas Tshithigona okwa ti ehangano lavo ota li lalakanene okuyambidida ovanhu ve li moluhepo momidingonoko unene tuu ovanyasha.

Okwa ti neudo momwedi Apiilili ehangano lavo ola talalela po oshipangelo shaNgela omo kwa li va kundafana nghene ve na okuyambidida oshipangelo.

“Otwa lombwelwa kombinga yEwalanda la pumbwa omatalashe molwashi oku na ovakainhu tava nangala pedu pehe na omatalashe omanga vamwe ova nangala keembete kuhe na omatalashe,” ta ti.

Tshithigona okwa ti osha fimana ngeenge omukainhu e li umbata ta nangala kombete kuna omatalashe noshoyo tadi momudinoko u li nawa.

Okwa indila omahangano a yooloka, ovanangeshefa opo a kale ta yambidida oshikondo shouhaku noshoyo eefikola.

Okwa ti eshi ka shishi oshikando shotete ehangano lavo ta li yambidida, onghee omudo wa dja ko ehangano lavo ola yandja oututa vokukwafela ounona voukadona meefikola ngeenge ve li komafimbo.

Moshipopiwa shaye kansela woshikandjohoololo Engela, Elkan Hainghumbi okwa ti Ewalanda laNgela oha li ya kula omwaalu muhapu wovakainhu ve li umbata mwa kwatelwa Ovaangola.

Okwa weda po ta ti Ewalanda laNgela olo limwe la kula moshitukulwa shaHangwena onghee omatalashe otaa ka eta elunduluko la kula mEwalanda noku xwexwepaleka onghalo kEwalanda.

fhamalwa@nepc.com.na