Omukulunhuwiliki wouhaku nonghalo nawa moshitukulwa shaShikoto Josua Nghipangelwa okwa ti ewalanda lomoshipangelo shaNandjokwe otali ka tamekwa okulongululwa momwedi ou.
Ewalanda onhele oyo hai kala ovakainhu ve li momateelelo noha i kwafele ovakainhu, unene ovo hava di kokule opo va kale popepi noshipangelo ngeenge ve li popepi nokupulumuna.
Omudo wa dja ko Kundana okwa li a nyola nghee ovakainhu ve li momateelelo tava nyenyeta molwaashi hava telekele poluhayela momutenya ngeenge va ka pulumuna koshipangelo shaNandjokwe.
Ovakainhu vamwe ohava nangala pomapakete a yalwa koshi yomiti shaashi mewalanda kamu na eenhele Ova hokolola tava luhapu ominino doundjuwo ohadi kala da fita , oshi hashi eta opo va kale va talama omeva ohanya. Onghalo ei ya nyika oshiponga kovakainhu veli pefimbo loku pulumuna oya eta opo ombelewa yomukulunhuwiliki wohauka i ye mo moshinima omu.
Okwa ti oundjuwo noyiikoshelo hai longifwa kovakainhu kewalanda otai ka longululwa nokutulwa omeva mapyu opo va kale tava longifa omeva apyu pefimbo loutalala. Okwa weda po onhele opo ha patelekele oomeme ve lihumbata otai ka tungilwa etala lomudile opo vaha tekele vali momutenya noshoyo okulela odula ngeenge tai loko.
Edi Nghipangelelwa okwe dipopya Etivali eshi a ya eenghundafana naKundana, a hokolola ta ti ombelewa yaye oya longekida oshimaliwa N$250 000 tashi ka longifwa okulongulula onhele yewalanda. Okwa yelifa ta ti tete ota ku tamekwa okutunga etala lokutelekela shaashi ovakainhu ohava telekele poluhaela ha patalama omeva, nokonima ota ku tamekwa okulonga oundjuwo.
“Ovanhu ngeenge tava lyata omeva a kaka otashi dulu okueta omikifi da yooloka odo hadi etwa kekako,” ta ti. Nghipangelewa okwa ti eshongo loshimaliwa olo unene lataalelwa kombelwa yaye opo i dule okukala tai kandula po omashongo a taalelwa koshipangelo noshoyo kamandi ouhaku moshitukulwa.
Onghee okwa indila omahangano a yooloka, ovanangeshefa noshoyo ovaleli vopapolitika opo ve uye okuyambidida ewalanda noshimaliwa ile noilongifo opo li kale la pwa diva.
“Ku keshe ou e na ehalo lokuyambidida na kale a kwatafana nombelewa yange. Osha fimana ngeenge oshiwana tashi shakeneke epangelo ondjilakati tashi pitile mokuyambidida oshikondo shouhaku,” ta ti.
fhamalwa@nepc.com.na