Tsandi - Kansela Junias Amunkete okwa ti oshitukulwa  shaTsandi osho shimwe shomoikandjohoololo moshitukulwa shaMusati oyo tai endelele meputuko. 

Amukete okwa hokololela Kundana kutya Tsandi okwa li ashike oshitopolwa sha nyika oushai, shi na ashike eepate deengalama ashike paife dihapu domudo oda ninga eeteya.

Okwa twikila kutya natango, ope na omafeneko eenhele edi da xupa ko da teelelika di ka tulwe oteya.

Okwa tumbula kutya eefikola adishe konyala paife odi bna omalusheno, nhatu ashike domoshitukulwa dihe na omalusheno, ashike omafano vati okwa tulwa meenhele opo va mone omalusheno.

“MoTsandi omwa kala mu na omhumbwe yakula yomaumbo e li pamufika wodoolopa, ashike otwa mona omaumbo a fika po33 eemwedi mbali da dja ko, oo a wedafana naa a kala mo. Ashike nande ongaho ovanhu onghee ngaho tava ende tava tungu, voo tava ende tava lande,” Amukete ta ti.

Okwa tumbula yoo kutya vahapu ova kala hava nyenyeta omakwatafano opautekenika taa shongola, ashike paife vati nande omunhu oku li poima pa finana pa fa shike, omakwatafano vati otaa tondoka ashike.

Nonande vati exumokomesho modoolopa tali tondoka, vati ova pumbwa omeva moshitukulwa, yoo nondjala natango onghee ngaho tai denge peenhele dimwe.

“Omaumbo ahapu aa opo taa ende taa tungwa ohaa fiye po eevili domeva edi dili popepi, voo tave ke lihanga tava tungu kokule nomeva. Ominino dimwe natango onghee ngaho da tulilwe medu eshi oshilongo opo sha manguluka, paife eshi da dengwa komutenya ohadi topa ashike. Dimwe nokuli ohadi topele dihapu oshita, doo okudilonga natango ohashi pula ondjila ile voo ovanhu onghee ngaho tava fi enota lamatutu,” Amukete ta ti.

Okwa twikila yoo kutya omaumbo natango eshi taa ende taa hapupala, ominino domeva natango ohadi nane noudjuu.

Okwa tumbula kutya ohave lihange tava kufa omaloli opo va dule okutwala omeva kovanhu ava ve li komaushai opo ashike va dule okunwa navo.

Kombinga yondjala vati omaumbo ahapu otaa dengwa kunakaidi, nohave lihange vati tava tula kumwe oufilinga opo va dule okuwedafana voo va landele ovanhu oikulya.

Okwa tumbula yoo kutya oshitukulwa shaMusati vati oshi na omaanda oilya a landwa kepangelo, oo a andelwa oilya tai di kovanafaalama, yoo tai palula omaumbo aa vati a mona oixuna.

“Ashike nande ongaho epangelo ola tokola oku tu kwafa, nonde lineekela kutya efimbo ngeenge la fiki ohatu ka kala mo nawa,” Amukete ta ti.

taimihaihambo2000@gmail.com