Omukuluntuwiliki gwelelo lyoshilando shaWindhoek Moses Matyayi okwa ti muni ita gwanitha okugandja evi oshali, nonando otashi kala oshipu okulanditha evi kondando yi li koondungu dhoonyala ngele epangelo olya yambidhidha mokweeta po iikwa niipangitho. 

Matyayi ndhika okwa li e dhi thamuna pethimbo a li ta popi nomuleli gwongundu yompilamena yopambelewa, McHenry Venaani mOmaandaha, ta ti elelo lyoshilando otali nana nuudhigu okugandja evi omolwompumbwe yoshimaliwa. Ashike kakwa li ta tsu kumwe naVenaani ngoka a hala oshilando shi gandje evi kaakalimo yokomalukanda oshali.

“Evi lyomondoolopa edhigu okutiwa nali gandjwe oshali. Ashike ngele otamu vulu oku li tu pa okuza kombinga yeni yopaliaamende, kutya omwe shi ikunda nope na oveta, otamu tu pe iimaliwa, ondi inekela omalelo ogendji goondoolopa oga ilongekidha kutya go otaga ka pula ashike oshimaliwa oshishonashona,” Matyayi ta ti ngaaka. 

Metalelopo lye lyopambelewa kelelo lyoshilando, mwa kwatelwa mayola Joseph Uapingene, Venaani okwa li a pula ngele mboka ye li momalukanda itaya vulu okupewa evi oshali ya tunge omagumbo gawo.

“Onda itaala kutya ethimbo olya thikana opo oshilongo shi tameke okwiipula kutya ngele otwa gandja evi ndika kaantu mboka ya kala pomahala mpoka uule woomvula dha konda 26, nangele owe ya pula ya yambule po omalukalwa gawo, otaya vulu oku shi ninga. Aantu itaya tungu oshoka omahala kage shi gawo,” Venaani ta ti. 

“Omalukanda goombashu otaga ende taga tamunuka, noshilando ihashi mono mo iiyemo yasha oshoka kaku na omayakulo gamuni,” A tsikile ngaaka.
Venaani, omuleli gwongundu yoPopular Democratic Movement (PDM), 

okwa li a popi eyikwatopomutima lye sho itaaku katukwa okugandjwa evi. Okwa ti ekandulepo limwe lyomukundu nguka epangelo lyi yambidhidhe okuyambula po evi lyomoondoolopa.

“Epulo lyeyambdidhidho oshinima oshinene sha pumbwa okwiikundwa  momutumba gwopashigwana,” ta ti ngaaka, ta gwedha po ta ti muni gwaWindhoek ita vulu okwiithikamena po ye mwene pwaa na eyambidhidho lyepangelo mokugandja evi.

Matyayi okwa li a ndjike oonyala mevi kutya evi lyomoondoolopa itali vulu okugandjwa oshali oshoka ohashi pula iimaliwa oyindji okweeta omauwanawa ngaashi nando oopaipi dhonyata naandhoka dhomeya.
Ashike ota yambidhidha omapopyo gaVenaani opo epangelo lyi yambidhidhe omalelo gopaendoolopa.