ONGWEDIVA - Kakukutu komatanga opolifi Inspekta General Joseph Shikongo okwa tanga Omupresidente Hage Geingob ongamulumenhu kwa li a fimaneka ombili neameno loshiwana.

“Presidente Geingob kakwa li e hole moshilongo mu na omalipumomumwe oshiwana unene tuu ngeenge ovanhu tava ningi omakangha,” ta ti.

Shikongo okwa ti okwa kala ta longo ongomukulunhu wovapolifi tava amene Geingob pefimbo kwa li omuprimaminista nokwa kala naye ve na ekwatafano liwa nelongelokumwe.

“Geingob okwa li e hole Namibia, e na e kwatafano liwa noishiindalongo shaashi alushe okwa li ha pula omukulunhu wetanga leameno, kakukutu komatango ngeenge Namibia oku na tuu elongelokumwe noilongo yopoushiinda okukaleka po eameno lokeengamba,” ta ti.

Okwa hokolola ta ti Geingob omulumenhu kwa li e hole oshiwana shaye unene tuu ngeenge e li poshivilo shonhumba molwaashi okwa li e hole okuminika ovanhu.

“Omafimbo amwe ohatu kala twa hala okukelela oshiwana shiha minike Geingob ashike kakwa li e hole hatu kelele ovanhu shaashi okwa hala okupopifwa koshiwana shaye she mu tula koshipundi,” Shikongo ta ti.

Shikongo okwa ti pefimbo a ulikwa a ninge kakukutu komatanga opolifi kuGeingob okwa li alushe e mu lombwele kutya moshilongo namu kale ombili muhe na ovanhu omalipumomumwe oshiwana.

- fhamalwa@nepc.com.na