Opu na owala lyangula, mOsoondaha uuyuni owa tala kuNamibia nolukeno nonehekeleko, sho tatu thindikile omuleli gwetu. Hage Gottfried Geingob, a matuka nokwa adha ethikilo lye, ngashiingeyi okwa mwena nota ka pewa egumbo lye lyahuguninwa pomayendo gaamboka yoonkama ngaa dhoka dhe – koHeroes Acre moWindhoek.

Omanga esiku lyokufumbika ependafule inali adha otatu dhimbuluka iilonga ya simana mbyoka a longele oshigwana shaNamibia noshaAfrica pakuudha.

Ethimbo lyaGeingob ongomupresudente gwoshilongo, olya opalekwa nolya ndandelwa uulenga keitulomo lye inaali tengauka mokukaleka po uundemokoli, enyanyu nosho wo onkalonawa yoshigwana she momikalo odhindji. Sho tatu kamutuluka omuleli gwetu, natu tale kuuthiga wetu e tu thigile ongoshigwana nonguuyuni.

Momukokomoko gwiilonga ye, Geingob okwa kala a pama pevi mukupopila oshigwana opo ashihe shi kale sha mangulaka, pamahupilo, uukolele, shi na ewi sho shi na uuthemba womuntu ngaashi wu li momishangwa dhoompango dhoshilongo nodhopaigwana. Okuza owala sho a tameke okukutha ombinga mekondjelomanguluko, sho a yi miilonga ongomupilima gwotango, e ta ningi omutse gwoshilongo, ina tengauka, ashike okwa kala owala ta nana ko kepaya, ta pameke uundemokoli nokusa oshimpwiyu kutya kehe Omunamibia oku na ewi, newi ndyoka olya uvika.

Otatu lili Geingob, omutholomi ngoka a kokola po oHarambee Prosperity Plan, oshiyuma shoka sha humbata uuwanawa woshigwana ashihe nomidhi dhasho odha mena metumbulo kutya “hamuntu ta thigwa konima yesiga”. Omwiityo ngoka, nenge oshiyuma shoka osha yambula po Aanamibia ayehe -kutya nee oyo oolye nenge oya za peni.

Ai, onani ya sile kondjoko, nonando a adhika ta hala oku shi fulula ko, omupresidente gwetu kuMaalitsa 2025 nani ina thika ko we.

Otwa zi owala nokutumbula shoka Geingob a longele oshigwana she, ashike iilonga ye oya laalela. Omundohotola Geingob okwa matuka methigathano lyombili nuukumwe. Ngaashi onkoshi, okwa lu a longitha elaka. Geingob ini ikwata mokulombwela nawa kehe ngoka a kambadhala okukwata uundemokoli nombili yaNamibia nongilishi. Ina tila yokiilongo yuuninginino - ohe ya lombwele e te ya tenteke mpee.

Ongomunashipundi gwokwaako kulilelepo opolitika negameno moSADC okwa longa nokwaahe na ezimbuko opo a kaleke po oonkundathana, elongelongelokumwe nengungumano mokati komitse dhiilongo.

Geingob okwa kala wo gumwe gwomomitse ominene ndhoka dha hala ondjodhi yomalalakano gokomumvo 2030 ya tsa. Naashika okwe shi ningi momitumba dhiigwanahangano

Megumbo, okwa kala wo a itula mo mepopilo lyuukolele woshigwana, shoka tashi ulikwa moshipopiwa she komutumba omu-78 gwiigwanahangano hoka a ti “uukolele owo ehukamugongo lyeputuko nehumokomeho lyoshigwana”. Ano a li e uvite kutya oshigwana kaashi na uukolele kashi na mpoka shu uka.

Niitya mbyoka kaya li osima yowala, oshoka okweshi ulike pethimbo uuyuni wali wa ponokolwa koCovid-19 sho Namibia a ningi gumwe gwoomiilongo mbyoka ya longo kaayi na ezimbuko, noya kelele omaso goCovid-19. Oomwenyo odhindji odha hupu omolwe elelo, euveko, neitulomo lye ewanana.

Melelo lyaGeingob iikundaneki nayo kaya li ya thigwa po!

Oumes, ngaashi twa li tumu shile noshilukadhina she, okwa li a mangulula iikundaneki nokwa popile emanguluko lyayo. Okwa li e uvite kutya iikundaneki oyi na oshinakugwanitwa sha simana mekaleko po lyuudemokoli. Okwa li a inekela emanguluko nuuthemba wokupopya ngoka wa gandjwa kekotampango lyoshilongo – ndyoka naye e li gumwe gwomaakokoli yalyo.

Kohi yewiliko lye Namibia okwa tsikila okukala shimwe shomiilongo yaAfrica mbyoka yi na oshigwana shi na ewi lyamanguluka, tashi pitile muuthemba wiikundaneki.

Itatu etha okumu mu lila.

Oumes a zimine, Geingob a itaele. Anuwa Omuwa ngele a ithana kapu na ngu ta tindi. Sho owala tatu vulu okuninga po okutaamba ko ehekeleko nembilipalo ndyoka e tu thigile tali zi muuthiga wombili, uundemokoli, uukolele, emanguluko, nethikopamwe, mbyoka tayi tsikile sigo okomapipi tage ya. Otatu ke mu yuulukwa momangundumano gomongeleka, miituthi yopapolitika moka a li he ya ta ndaanisa, miigongi yiikundaneki moka a li ha longitha unene ok gandja uuyelele koshigwana, omashendjo mbyoka a li e na, naunene omulumentu nguka okwa li ha popi sho a hala, kuye oshili – oshili ashike.

Lala nawa Oumes, ngoye u tegelele ongula yependuko.