Omulumentu gwomimvo 48, okwa si eso lyombaadhilila sho a dhipagwa kondjamba ndyoka yali ye ya tidha pamwe nayakwawo yaali.

Sha ikolelela kuDeputy Commissioner Moses Simaho, oshiningwanima shoka osha holoka momukunda Otjorute, lwopotundi 23h00, mehuulilo shiwike.

Otaku hokololwa kutya omulumentu ngoka pamwe nayakwawo yaali, oya li yuuvu ondjamba tayi inyenge mepya lyaandjawo. 

“Oyali ya tokola okuyi hinga mo, oshoka oyali yuuvite kutya iilya yawo otayi hanagulwa po,” ta hokolola ngaaka.

Nonando ondjamba okwali yazi mo mepya, oya tanauka e tayi lambalala po omulumentu nguka, noku mu dhipaga.

Ta ti, yakwawo mboka yaali okwa li ye shi pondola okumatuka po.

Ta gwedha po kutya nonando shoka okwa li sha holoka ethimbo lyuusiku, opolisi okwa li ya lopotelwa ashike esiku lya landula ko.

Omugandji gwomauyelele muuministeli womindhingoloko omatalelepo niihwa Romeo Muyunda okwa ti, ohashi uvitha nayi oku uva etumwalaka lyomuntu a kuthwa omwenyo kiiyamakuti.

“Ondjamba ndjoka oya matuka po ashike aanambelewa oye yili mokashoko opo yi dhipagwe,” ta ti ngaaka.

Uuministeli owa tseyitha kutya otau ka longekidha oshimaliwa N$100 000, shoku longekidha efumbiko lyanakusa, ngaashi naana sha kolekwa kokatendo komilandu noompango muuministeli womindhingoloko. “

Shoka itashi ti nakusa okwa futwa sho a dhipagwa kondjamba ihe okuyambidhidha aakwanezimo okulongekidha efumbiko lyomupambele gwawo ndyoka lya holoka ombaadhilila,” ta fatulula ngaaka. Natango uuministeli mbuka owa gandja omahekeleko kaakwanezimo yanakusa.

“Omaso ngoka ohage ya ombaadhilila, onkene pethimbo ndika otandi tsikile okukumagidha aakalimo ye li momahala ga nika oshiponga ya kale aluhe uupathi wiiyamakuti mbyoka oshoka oya nika oshiponga.

Muyunda okwa ti, pehuulilo lyomumvo gwa ziko, okwali ya lopotelwa natango omuntu a lika po kongandu koshitopolwa shaZambezi.

– vkaapanda@nepc.com.na