Osekundofikola yaHaimbili Haufiku moshitukulwa shaHangwena oya denga mbada oshivike sha dja ko konima eshi ya twala omapapa a fika po 50 keumbo. 

Haimbili Haufiku okwa li a fiya vahapu vehe na oitya nomatumbulo eshi ovanafikola va li tava likola omapapa mosekundofikola yaShituwa moshitukulwa shaHangwena oshivike sha dja ko.

Ngoloneya woshitukulwa shaHangwena Walde Ndevashiya okwa tumbula kutya epangelo ohali fi oshisho okuyandja omwaalu woimaliwa koshikondo shehongo ngeenge tashi ya komutengenekwafaneko woshimaliwa hau yandjwa odula keshe. “Ohashi kala shiwa ngeenge oshikondo shehongo sha pewa oikwafifo ya wana opo ovanafikola va dule okulonga noudiinini vehe na omhumbwe yasha,” Ndevashiya ta ti.

 Ndevashiya okwa tumbula yoo kutya okwa hala oshivilo shi kale etwomukumo keefikola pamwe novahongi vavo opo va twikile okulonga noudiinini peefikola davo.

Movahongwa dingi va shanga ondodo 11 ko-NSSCO Haimbili okwa vena omapapa e li 25, omanga Ponhofi a ya nomapapa aheyali, yee Shituwa ta i nomapapa atatu.

 Ko-NSSCAS Haimbili Haufiku  okwa ya nomapapa e li 20. Ongha oya ya nomapapa e li ahamano, omanga Eengedjo da pewa omapapa e li atano.  

Ndevashiya okwa twikila kutya oshitukulwa osha li shi na ehongo tali shongola odula ya dja ko, noshe va longa omupetuko opo va dule okuninga nawa odula ei.

Omukulunhufikola waHaimbili Haufiku Rabanus Shaninga okwa hokolola kutya oo omukalondjiikilile mofikola yavo okukala ovo alushe dingi moshitukulwa ashishe. Okwa yelifa kutya ofikola oi na ovahongi ve lipaka mo efimbo alishe, nohava longo ashike eshi shi li momufindalandu waashi va pumbwa okulonga. “Ovanafikola ngeenge ve li mofikola navo ohava kala ve lipyakidila nokulesha omambo efimbo alishe nosha ninga oandaxa yavo. Vahapu vomuvo ove na omikalo noshe tu ningila shipu ongovahongi oku va kondolola oshoyo okulonga navo efimbo alishe,” Shaninga ta weda po.