Elelo lyondoolopa yaHelao Nafidi opamwe neyambidhidho lyehangano lyoUnesco, oya yambindhindha oosikola niikwathitholongo oshowo otenga yomeya, mbyoka ayihe kumwe yi na ongushu yoshimaliwa N$456 000.

Mayola gwondoolopa yaHelao Nafidi Darius Shaalukeni okwa popi kutya ehangano lyoUnesco okwa li lya yambidhidha elelo lyondoolopa, omolwuukume ye mboka ya panga momumvo 2022.

‘’Okwa li twa shayina etsokumwe nehangano lyoUnesco opo tu longele kumwe nokuyambidhidhathana mokuyambula po oondoolopa dhetu, oshigwana shetu oshowo oku dhi humitha komeho,” ta fatulula ngaaka.

Omayambidhidho ngoka otaga eta elunduluko moonkalamwenyo dhaalongwa mboka taya ka ninga aanelago ya taalela onkalo ondhigu.

Ta ti, ope na aalongwa mboka yaa na aakuluntu ye na iiyemo omanga yamwe kape na mboka taye ya yambadhidha, mboka  oyo ne taya tothwa mo opo ya yambidhidhwe..

“Elalakano okukaleka okanona Okanamibia mosikola, opo ka mone elongo ka kale sha monakuyiwa. Ngele okanona oka taalela omashongo ga yooloka omanga ke li mosikola, ohashi nkundipaleke omadhiladhilo gawo sigo ya kala itaaya pwilikine we moongulu, shoka hashi eta endopo nenge ethigepo lyosikola,’’ ta fatulula ngaaka.

Ndyoka olyo etompelo enene aanona mboka ya pumbwa okuyambidhidhwa poompito adhihe.

Shaalukeni okwa li a tsu aalongwa omukumo opo ya ka longithe iikwathithilonga yosikola mbyoka, ya itula mo.

-vkaapanda@nepc.com.na