ONGWEDIVA - Omupresidente Hage Geingob, metumwalaka laye lomahekeleko okwa tanga Hadino Hishongwa onga omulumenhu ha longo noudiinini nokwa dana onghandangala yakula pefimbo lekondjelomanguluko eshi a kufa ombinga moita.

Okwa ti Hishongwa okwa li omukondjelimanguluko woshili pefimbo kwa li e li kondje yoshilongo ta lu moita nelalakano Namibia a mone emanguluko.

Hishongwa okwa li elenga lakula loshikandjo shaMhedi melelo laUkwanyama nokwa li yoo vali omukaleliposhilongo waNamibia ko koBotswana. Okwa xulifa mepupi lomido 80 oshivike sha dja ko koshipangelo shopaumwene shaMedi Park mOngwediva.

Geingob okwa ti Hishongwa okwa li omuleli koikondo ya yooloka mwa kwatelwa ongudu yoSwapo omo a kale ta wilike oshiwana nombili. Okwa ti Hishongwa okwa li yoo vali oshilyo shoSwapo shoshili okudja omudo ongudu ya totwa po nokwa yambula po oSwapo pefimbo loita eshi a kala ta xwaxwameke ovakwaita va longe nondjungu mokulwifa eembulu dokatongotongo. Omalenga makwao melelo laUkwanyama okwa tanga Hishongwa ongaa omulumenhu e na elandulafano nelongelokumwe novaleli vakwao.

Hishongwa ota lililwa keumbo laye komukunda Onekwaya nomalongekido epako laye oku li metifa.

 fhamalwa@nepc.com.na