Vahapu otava tange omunawino woikwambaanga moshilongo Tomas Koneka Iindji onga a li omulumenhu omunambili, e hole okuyambidida ovanangeshefa. Iindji okwa xulifa Etivali efmbo longula moshipangelo koWindhoek, mepupi lomido 44. Otaku hokololwa kutya Iindji okwa ombokelwa pefimbo a li koshivilo shouvalelo wokuongela oshimaliwa oo wa li wa longekidwa kelelo lodoolopa yaNdangwa.
Tarah Shaanika oo a li Omukulunhuwiliki mukulu woamibia Chamber of Commerce and Industry (NCCI) pefimbo Iindji a li omunashipundi wevava wehangano lovanandeshefa konooli okwa ti Iindji okwa li omulumenhu e na elongelokumwe nokwa li a fimaneka oshiwana. "Onda longa nIindji pefimbo a li oye omukulunhu wo-NCCI konooli. Otwa kala alushe tu na ekwatafano liwa naye," ta hokolola. Shaanika okwa ti omulumenhu ou okwa dana onghandangala yakula mokuyambidida ovanangeshefa vomoshilongo. Ta ti Iindji kakwa li e na okatongo molwaashi okwa li alushe e hole ovanhu veendodo da yooloka. "Namibia okwa kanifa omuleli muwa. Omulumenhu ha longo noudinini," ta ti. Mayola wodoolopa yaNdangwa Paavo Amwele okwa hokolola ta ti efiku Iindji a li koshivilo shouvalelo oye kwa li e kwetele komesho oshivilo ta xwaxwameke ovanhu va yandje oshimaliwa shihapu.
"Otwa pandula Iindji molwaashi okwa fiya a yambidida odoolopa yetu. Mboli okwa li ashike e uya okulekela," ta ti. Amwele okwa ti Iindji okwa yambidida elelo lodoolopa yaNdangwa lwoikando ya yooloka unene ngeenge tashi ya pokukonga oshimaliwa shokuninga omaulikilo oipindi. "Ovanangeshefa vahapu ova mona omauwa okupitila mokuyambididwa kuIindji. Okwa li a fimaneka oshikondo shomangeshefelo," ta ti.
Omufitaongalo weongalo Othika, Hosea Namusha okwa ti Iindji okwa fiya po omwaka wakula meongalo lavo.
"Otwa ka nifa omulumenhu kwa li alushe e hole okuyambidida ongeleka yetu noshimaliwa. Ongeleka yetu oya xuma nawa komesho molweyambidido twa pewa kuIindji," ta ti. Okwa weda po ta ti alushe ngeenge ve na oinyangadalwa meongalo Iindji iha faula okuholoka. Okwa ti Iindji okwa li omulumenhu e hole ongeleka noku na etilokalunga.
Namusha okwa ti Iindji omulumenhu e hole okukufa ombinga mokuudifa shaashi omafimbo nomafimbo okwa li ha udifile eongalo. "Iindji okwa li omwiimbi muwa.
Ngeenge owa hange e li mongeleka oha imbi mokule yee ta yolo," ta ti.
Omupedupresidente wehongo lovanangeshefa NALOBA, Kanu Amadhila okwa ti ovanangeshefa vomoshilongo ova dengwa pomutima kefyo laIindji shaashi okwa li a fimaneka ovanangeshefa veendodo da yooloka. "Iindji okwa li omulumenhu alushe e hole omashendjo ngeenge e li mokati kovanhu," ta ti. Iindji okwa fiya po omukulukadi waye nounona vaye voukadona vavali. Omalongekido epako laye oku li metifa.
- fhamalwa@nepc.com.na