EPYENENE-Oshilyo shongudu yopolitika yoNEFF Kalimbo Iipumbu okwa ti ovanhu ve li meembelewa depangelo nava yakule nawa oshiwana.
Iipumbu ou e li yoo vali mwene womukunda Epyenene, okwa ti okwa didilika
ovanambelewa vamwe hava nyamukula nai oshiwana ngeenge sha ka konga omayakulo keembelewa depangelo.
Edi Iipumbu okwe di popya kefiku ledimbuluko lefiku lemanguluko la li komukunda Epyenene moshitukulwa shaShana oshivike sha djako.
Ovanamukunda va dja komikunda da yooloka okwa li va ngudumana keumbo lamwene womukunda wavo Iipumbu okudimbuluku efiku lemanguluko.
Omudo keshe ovanamukunda vomEpyenene ohava dimbuluka efiku lemanguluko.
Oshiwana okwa li sha holoka momwaalu muhapu tashi imbi omaimbili ekondjelomanguluko, okwa li yoo vali sha pewa omusha.
Moshipopiwa shaye Iipumbu okwa ti Namibia paife oshilongo sha manguluka shi na ombili onghee osha fimana opo ovanhu ve li meembelewa depangelo va ya kule nawa oshiwana. “Ovaleli va yooloka ve li meembelewa depangelo na nye kwashipalekeni kutya ota mu yandjaneke omayakulo koshiwana. Onghee osha fimana ngeenge omunhu keshe ta mono omauwa okudilila kepangelo,” Iipumbu ta ti.
Okwa popya yoo vali ta ti osha fimana okudimbuluka efiku lemanguluko laNamibia molwashi ola fimana mondjokonona yoshilongo.
“Ka kwa li shipu kuNamibia a mone emanguluko onghee natu fimanekeni efiku e li molwashi ola pula eemwenyo dovanhu,” ta ti.
Lwopokati opo, Iipumbu okwa twa omukumo oshiwana shomomukunda waye opo shi kale shina oukumwe nelongelokumwe.
“Natu ka leni hatu ya kulafeneni, okulopota oimbuluma noshoyo okukelela omahepeko omomaumbo momidingonoko detu,” ta ti.