UUKWANGULA -Oshigwana osha kumagidhwa kaashi dhike we omalukalwa gawo moondjila ndhomeya gefundja, oshoka otashi tula oonkalamwenyo dhawo moshiponga.
Ndhoka okwa li dha popiwa komupilima minista Saara Kuugongelwa-Amadhila Etitano, sho kwa li kwa ndhimbulukiwa esiku lyokushonopalitha omaupyakandhi haga etwa kuushitwe, kUukwangula moshitopolwa shaShana.
Esiku ndyoka okwali lya ndhimbulukiwa kohi yoshipalanyolo “Okukondjela onakuyiwa yili nawa”.
Kuugongelwa-Amadhila okwa li a londodha ngaaka sho kwali ya ndhindhilike omaupyakandhi haga ndhigupalele epangelo uuna efundja lya hanagula po omalukalwa, oshowo okutembundha noku sila oshimpwiyu mboka ya ningi iihakanwa.
“Oyendji ohaya ka tungila pomahala haga ende nale omeya, ihe shoka kashili mondjila oshoka ohashi eta ishewe uupyakandhi wa gwedhwapo,” ta popi ngaaka.
Ta ti, ngaashi sha shiwika nawa, Namibia okwa ningi oshihakanwa shomahepeko gopaushitwe, ngaashi efundja, epeya, ondjala oshowo oshikungulu.
okwa popi ta ti, ayihe mbyoka ohayi etwa omolwa onkalo yombepo ndyoka hayi lunduluka ethimbo kehe.
“Omumvo nguka iitopolwa yokoNooli Omusati, Oshana oshowo oshikoto oya li ya hanagulwa kefundja no konima omuloka sho gwa hulu, okwa li natago ya ponokelwa kondjala yiimuna oshowo yaantu,” ta popi ngaaka. Ta ti, omapya ogendji oga li ga hanagulwa po kefundja no konima omuloka natango ka kwali gwa gwana opo ya likole mo sha momapya.
Ta gwedhapo ta ti, omaundhigu agehe ngoka ga holoka ogo ga shingi epangelo opo lyi yambindhindhe oshigwana noshikukuta.
“Otandi kumagindha mboka taya kapewa oshikunakugwanitha shoku hawaleka oshikukuta opo yeshi ninge ngaashi omalombwelo ta gati, ihe haku kalitha oshikukuta konima ye kumba,” ta kumagindha ngaaka.
Ngaashi sha kala tashi tseyithwa okuza kombelewa yomupilima minista kutya oshikukuta otashi ka topolelwa kehe ngoka a ndhengwa koshikukuta, esiku ndyoka okwali ya topola wo natango uukalata woku hawala oshikukuta.
Uukalata mboka okwali wa gandjwa kwaamboka yiishangitha oshikukuta.
Mboka ya pewa esiku ndyoka otaya ka longithwa manga onga oshiholelwa opo ku talike nkene tau longo, nonando ayehe otaya ka topolelwa.
-vkaapanda@nepc.com.na