Lucas Tsamseb a shivika nawa Irivari okwa ninga odula neemwedi nhano modolongo paife konima eshi a kwatwa po omudo 2022 peinda lopolifi kOshivelo.
Omulumenhu ou ota tengenekwa e li pomido 22 nokwa shivika nawa okupitila komalungula eshi ke na ouvidio tau nyanyukifa oshiwana.
Omukulunhu koshikondo shokukelela oimbuluma moshitukulwa shaShikoto omupedu Commissioner Wynad Neels okwa hokolola ta ti Irivari okwe liteela melimba lopolifi omo hamu tulwa oinima ei hai kufwa ovanhu ngeenge va hangika noinima oyo inai pitikwa okupita peinda lopolifi pOshivelo.
Vati Irivari okwa longifa oshitenda nokuteya omuvelo welimba, nokonima okwa kufa mo oipakete yomalodu ouwhiskey itatu.
Opolifi oya hokolola tai ti oshiningwanima eshi osha ningwa mokati koufiku. Omulumenhu ou okwa holoka momhangu lwoikando ihamano konima eshi a kwatwa po shaashi a vaka ouWhiskey melimba lopolifi.
Oshibofa shaye osha undulilwa komafiku 14 Mei 2024 omanga opolifi tai ningi omakonakono omoule.
Irivari okwa li yoo vali a kwatwa po momudo 2021 mekwatafano loshibofa shekwatonghonga omo kwa li ta ku fekelwa kutya okwa kwata omukainhu onghonga.
Okwa li a pewa omhito yokulifutila mo modolongo noshimaliwa N$2 000 konima eshi oshiwana she mu yambidida noshimaliwa shokulifutila mo.
Irivari ou okwa li yoo vali a nyika ounghundi omudo 2021 omo kwa li a tambulilwa moshipangelo oule wemweedi nhee.
Oshiwana osha kala nokuyambidida okamatyona aka shaashi taka dengwa koluhepo nondjala.