Epangelo lyaJapan olya gandja oshimaliwa shoomilliona N$9 ndhoka dha tula miilonga oproyeka ya nuninwa okuhwepopaleka oshowo okupalutha oshigwana sha taalela onkalo ondhigu.
Minista guundjolowele nonkalonawa Kalumbi Shangula okwa ti oproyeka ndjoka oya tegelelwa yi ete omalunduluko, ngaashi okushunitha pevi omikithi, aantu ye na uundjolowele oshowo okuhwepopaleka oonkalo dhaantu ya taalela onkalo ondhigu kiitopolwa ngaashi Kunene, Omaheke oshowo Khomas.
‘’Elalakano okukandula po omaupyakadhi gomikithi hadhi vulu okufaalela oomwenyo dhaantu omolwondjala ngaashi, shoka hashi yematitha epangelo nomahangano galwe gokondje ngoka haga longo nuudhiginini okulwitha omaupyakadhi ga tya ngaaka,’’ ta fatulula ngaaka. Shangula okwa pandula epangelo lyaJapan sho lya yambidhidha noshimaliwa shoka okuyambidhidha Aanamibia okupitila mehangano lyoWorld Health Organisation (WHO).
Omunambelewa ta kalele po Namibia mehangano lyo-WHO Mary Brantuo, okwa ti oshimaliwa sha gandjwa kepangelo lyaJapan shi thike (USD 500,000), ehangano lyawo olye ya po noproyeka tayi ithanwa “Okwiindjipaleka oompito dhuukolele oshowo okugandja omayakulo kaantu ya taalela onkalo ondhigu kOmaheke, Kunene oshowo Khomas,” ta fatulula ngaaka. “Elalakano, okulundulula oonkalo dha taalelwa kaantu miitopolwa ya zi nokutumbulwa, unene aakiintu oshowo aanona, nokushonopaleka oompito dhuuvu wa yooloka hawu etwa kondjala nokuyanda omaso oshowo okukwashilipaleka kutya otaya mono omayakulo ga simana,” ta ti ngaaka.
Brantuo natango okwa totha mo kutya oproyeka ndjoka oya totwa po okukeelela nokukondolola oomeme naanona yaa kwate komanyutu opo iipotha yomanyutu yi shunithwe pevi nenge ga hule po thilu.
Ta gwedha po ta ti, natango oproyeka ndjika otayi kala yi na ooprogalama dhokugamena aanano noomeme kaaya hepekwe mo mikalo dha yooloka, oshowo oku ya hwahwameka ya kale ye na ontseyo yaashoka ye na okuninga uuna ya thimininikilwa po konkalo.
-vkaapanda@nepc.com.na