Uuministeli welongo owa tseyitha kutya omolwa omalongekindho gefumbiko lyomupresidente omukulu gwoshilongo, ngula, Etitano ka ku na osikola.
Omukuluntu wiliki muuministeli welongo Sanet Steenkamp okwa ti, uuministeli owa tokola ngaaka opo ku gandjwe esimaneko lye so lyomupresidente kwali, Hage Geingob. “Oosikola adhihe odha tegelelwa oku kala dha pata moshilongo. Oosikola koWindhoek mEtitato okuza po15h00, nadhi longekindhe aalongwa yathika 20, opo yaka kalele po oosikola dhawo koshituthi ndhimbuluko,” ta ti ngaaka. Okwa popi wo kutya otaya ka tseyitha momukokomoko gwesiku kutya aalongwa mboka otaya kaadhika peni kiiyenditho opo ya falwe koshituthi ndhimbuluko. “Shika osha tokolwa sha ikolelela ko katendo okati-3, komomumvo 2020,” ta fatulula ngaaka.
Oosikola ndhimwe ngaashi Windhoek Gymnasium, okwa pititha etumwalaka okuya kaavali kutya, aalongwa yo posikola yawo, otaya tsikile nootundi, mEtitano.
Oosikola moshilongo ashihe odha ningi esiku tandhi ndhimbulukwa omupresidente omukulu, momikalo dha yooloka.
Aalongwa oya kala noku gandja omahakeleko, okupitila moondjimbo, muutewo no sho tuu.
Sho omalongekindho gefumbiko ga fumako, epangelo olya tseyithile oshigwana kutya osha manguluka oku ka landitha uukwashike pendjewo, esiku lyoshituthi ndhimbuluko. Minista gwomauyelele Emma Theofelus okwa ti, oshigwana nashi manguluke oku kashingitha kehe shoka, ihe iikolitha inayi pitikwa nando.
“Nonando ta tu kala tu na etanga lyegameno tali kwashilipaleke kutya ayihe oyili nawa, ota tu indile natango oshigwanna shi iyuthe koompango dha tulwa po,” ta kumagidha ngaaka. Theofilus okwa gwedha po kutya aakwiilongo taya zi moAfrica yeli 18, oya kwashilipaleke kutya otaya holoka esiku lyefumbiko, oshowo yamwe ya gwedhwa po.
“Ota tu kumagidha wo oshigwana shi hinge nuukeka oshoka oshilando pangelo otashi kala shuudha,” ta kumagidha ngaaka.
Ta ti, shoka tashi taambathanwa kutya omuna iilyo yetanga lyegameno ya zi kiilongo yilwe yaAfrica yili 650, kashi shi sho shili. Theofelus okwa ti, efumbiko otali ningilwa koHeroes Acre Osoondaha po 10h00.
-vkaapanda@nepc.com.na