Kakukutu komatanga gopolisi Joseph Shikongo okwa kunkilile oshigwana kaashi kale tashi taambathana komalungula uuvidio wiiningwanima tayi holoka kondje yoshilongo oshoka otau pukitha nokutilitha oshigwana.

Shikongo okwa li a kumagidha ngaaka sho kwa li kwa tambathanwa okavidiio kokanona okashona taka dhengagulwa.

“Okavidio hoka oka li ka tilitha Aanamibia oyendji noka li ka tamekwa okwaandjanekwa nomanyenyeto, ihe oshiningwanima osha holoka omimvo ndatu dha pita kondje yoshilongo,” Shikongo a popi ngaaka momushangwa gwa itithwa mehuliloshiwike.

Ta ti, opolisi yaNamibia oya ilongekidha aluhe okuwiidhopa miiningwanima yoludhi ndoka uuna ya holoka moNamibia.

Ta gwedha po ta ti, moNamibia inamu pitikwa omahepeko , kehe ngoka ta ka longa iilonga ya tya ngaaka na lopotwe mbala opo a katukilwe onkatu.

Opolisi miiitopolwa yokonooli oya londodha oshigwana opo shi ikaleke kokule niimbuluma moshitopolwa shaShana. Opolisi moshitopolwa shOshana monkuundathana noshifonkundaneki shika oya ti oya ilongekidha okulwitha iimbuluma oshowo okutaalela omaupyakadhi moshitopolwa sho ya tameke nopatolola oshiwike sha zi ko.

Omukuluntu gwopolisi moshitopolwa shaShana Naftal Lungameni Sakaria okwa ti opolisi moshitopolwa she oya ilongekidha lela, yo itayi ka thiga nando emanya lya londa kekwawo.

“Oyendj oye hole okupashiyona mehuliloshiwike notaya londodhwa yaa hinge ye li kohi yomalovu. Iiponga yomoondjila oshowo iimbuluma oyindji ohayi holoka ngele gumwe ta hingi a nwa omalovu,”Sakaria  ta ti ngaaka.

Ta ti, opolisi oya ilongekidha, okukaleka po omalandulathano agehe gomoondjila, okukeelela iiponga oshowo okugamena oshigwana okulongelwa omiyonena.

Ta gwedha po ta ti itaya ka pitika aahingi kaaye na omikanda dhokuhinga moshitopolwa shawo oshowo omuhingi e li kohi yiikolitha.

Sakaria ta ti, opolisi otayi ka kala pokati koondjila ya ninga oomboloka, naakwashigwana otaya indilwa ya kale taya longele kumwe nopolisi okulopota iiningwanima inayi uka momidhingoloko dhawo.

 “Otatu ka kala natango tu na opolisi yi li miikonga tayi longitha omikalo dhokulwitha iimbuluma, onkene oshigwana otashi indilwa shi yambidhidhe opolisi opo ya adhe esindano mwaashoka, opo iimbuluma yi shonopale,” ta kumagidha ngaaka.

Okwa popi kutya aniwa omumvo gwa zi ko, aahingi yamwe oya li ya yi konima yekumba sho ya hingi ye li kohi yiikolitha, ihe shoka ina hala shi iyendulule omumvo nguka. -vkaapanda@nepc.com.na