Opolisi moshitopolwa shaMusati oya patululile omulumentu gwomimvo 33 oshipotha sho ta fekelwa a kwata koonkondo okakadhona komimvo 14, ee taka ningi etegelelo.
Omupevikuluntu gwopolisi moshitopolwa shaMusati Moses Simaho okwa ti oshiningwanima shoka osha ningilwa momukunda Onawa momundhingoloko Anamulenge, ashike ethimbo nesiku moka sha ningwa inali tseyika.
Otaku hokololwa kutya omulumentu ngoka e shiwike nawa, okwa li a kwata okakadhona hoka koonkondo, ee taka ningi etegelelo. Inaku yelithwa ekwatathano lyawo kutya olyi li ngiini nongele oya pambathana.
Opolisi oya ti oyi li metifa oku ka manga po omulumentu ngoka, nomakonakono ga gwedhwa po otaga tsikile. Opolisi oya kumagidha aakuluntu ya kale taya longo aanona momagumbo nkene ye na okulopota mbala uuna taya ningilwa omiyonena oshowo omahepeko momagumbo.
“Aanona yaakadhona oya taalela omashongo ogendji kehe mpoka ye li, yamwe ohaya ningilwa omahepeko, yo taya mbandamekwa, omanga yamwe haya hekwa opo yaa tseyithile aakuluntu yawo,’’ opolisi ya popi ngaaka.
Omahepeko ngoka taga holoka momagumbo ohaga yonagula onakuyiwa yaanona.
Opolisi moshitopolwa shaMusati omasiku gaali ga piti, oya manga po omulumentu gwomimvo 33, sho taku fekelwa a kwata koonkondo omukulupe gwomimvo 71. Shika osha ningilwa momukunda Okathitu B, moshikandjohogololo shOtamanzi. Shoka osha holoka ashike iiwike iyali ya piti, sho opolisi yaNamibia ya li ya tseyitha oshiningwanima shi nyanyaleka, shomukulupe gwomimvo 64 Helena Wimmert a yugwa iinima ye, ta kwatwa koonkondo nokudhipagwa.
Oshiningwanima shoka osha holoka moRehoboth, Block A. Otaku hokololwa kutya nakusa okwa li a adhika a hulwa iikutu, ye okwa kutulwa omunino noshinima kaashi shiwike.
Omukufekelwa moshiningwanima shika gwomimvo 29 ngoka a adhika e li kondje nombooloha molwedhipago, anuwa omupambele gwanakusa.
Nakulonga oshikulumuna shoka okwa mangwa po nale nokwa holoka mompangu.
-vkaapanda@nepc.com.na