RUNDU– Omupresidente gwongu yedhina Landless People’s Movement (LPM) Bernadus Swartbooi okwa ti ongundu yawo otayi tsu iilyaalyaka mboka ye li miikumungu ya nika edhengelo lyondhi peho, na inai fa oSwapo. Swartbooi ndhika okwa li e dhi popi koRundu mehuliloshiwike, poshigongi shoka sha li kolukanda lwedhina Ndama mOsoondaha.

“Miitopolwa moka ongundu yetu tayi lele, Shampa gumwe gomaaleli yetu a tumbulilwa uulingi;lingi, nena ohatu mu tidha mbala. Aantu otaya tit se ongundu yaa na omakankameno sho tatu longo ngaaka. Ashike ngwele otwa longo ngaashi oSwapo, nena katu li moshili,” ta ti ngaaka. Ta ti LPM itayi ki idhidhimikila aaleli taya longo uulingilingi.

“Uuna aaleli itaaya ihumbata nawa ohaya lombwelwa ya lundulule nenge ya thige po ongundu. “Mo-LPM, ngele owa hala okulonga uulingilingi, nena open a ongundu yimwe. Inda kongundu ndjoka,” ta ti ngaaka. Okwa ti wo oya tula aagundjuka yoomvula 20-35 melelo lyawo, moka haye ya dheula opo ya ka kale aaleli yokomongula ye na oshisho.

“Otwa kala nokupopya kutya ngula yaagundjuka itayi undulilwa komeho. Natu kuthe aagundjuka mboka kaaye na ontseyo ee tatu yambuleni po oshigwana nayo,” ta ti ngaaka. Ongundu ye, ta ti oyi na ekwatathano ewanawa naaleli yopamuthigululwakalo opo ya uve ko nawa omaupyakadhi gaakwashigwana.

“LPM oya lundulula onkalo yomahogololo, moka inaayi hala ashike omawi, ashike aantu yomihoko adhihe oya taambwa ko. Otwa hala okuyambula po aaleli taya vulu okulela. Ngele otwa tumu aantu kaaye na ohole noshigwana, nena itaya ka longa pauyuuki,” ta ti ngaaka.

“Omuleli omwaanawa ita kotha ngele aantu ye oya sa ondjala, kaye na iilonga nenge kaaye na omagumbo. Nena ota ka longa nuudhiginini okukandula po uupyakadhi mbuka oshoka okuhole aantu ye. Etumwalaka ndika lyohole kali shi ashike lyomongeleka ashike olyuuntu womuntu,” Swartbooi ta ti ngaaka.

-Nampa