ONGWEDIVA - Ovanhu onghee nga tava kwatwa koshidu shamalaria monooli nomafyo onghee ngaa ta lopotwa ovanhu tava xulifa kumalaria.
O m u k u l u n h u w i l i k i woshipangelo shaShakati Dr Ruben Kanime okwa ti okwa ti okudja omudo wa djako omwedi Novomba fiyo oneudo moshipangelo shaShakati omwa lopotwa omivalu dovanhu 32 va kwakwa kumalaria.
Okwa ti ovanhu vavali ova lopotwa va xulifa konima eshi va kwatwa kumalaria.
Okwa ti ombelewa yoshikondo shouhaku moshitukulwa shaShana otai twikile nokulwifa oshidu malaria noshoyo okukwashipaleka kutya ovanhu otava pewa eenete dokukelela eemwi nouyelele nghene ve na okulela malaria.
Omunambelewa wouhaku moshipangelo shaEenhana Dr Odon Nkongolo okwa ti oshitukulwa shaHangewena okudja omudo wa djako osha lopotwa omivalu dovanhu va kwatwa kumalaria ve li 1339 nomafyo ovanhu vane va xulifa.
Okwa yelifa ta ti oshipangelo shaNgela shalopotwa ovanhu va kwatwa kumalaria 676, Eenhana 430, omanga Okongo 233.
Oshipangelo shaNgela osha lopotwa omivalu di li pombada molwashi oshi li kombinga yokeengamba daAngola omo oha shi yandje omayakulu ouhaku kovakwashiwana Ovaangola vahapu.
Onghee malaria oha tandavele noupu kombinga yokeengamba molwashi ovanhu vamwe ohava di mOangola va kwatwa nale kumalaria.
Nkongolo okwa ouministeli wouhaku owa tameka okutula moilonga oshikonga shokupombela momaumbo onghela komukunda Okambebe oshikandjohoololo shaNgenga.
Okwa kumaida oshiwana opo shi longele kumwe novanailonga vopombela ngeenge tava pula vaye momaumbo avo.
“Osha fimana ngeenge meenduda ta mu twimikilwa omiti opo ku kelelwe etandavelo lomalaria,” ta ti.
Okwa ti ovanhu ve na omadidiliko oshidu malaria nava lopotwe pefimbo opo va pewa epango lopaunamiti.
“Oipangelo otai twikile nokuyandjaneka eenete deemwe moshiwana,” ta ti.
Okwa kumaida oshiwana opo shi kaleke po eenhele davo da yela efimbo keshe, novadali opo va kwashipaleka kutya ounona vavo ove li mefiloshisho lokukala va tuvikilwa meenete dokukelela eemwe.
fhamalwa@nepc.com.na