ONGWEDIVA - Ovakainhu tava pulumunine moshipangelo shopaumwene shaMedi Park mOngwediva ova etelwa omayakulo popepi okukala tava ningile ounona vavo eedjapo domadalo moshipangelo.
Oshivike sha dja ko ouministeli woikwameni neameno lokeengamba owa patulula ombelewa moshipangelo shaMedi Park opo i kale tai yandje omayakulo okuningila ounona eedjapo domadalo.
Okwa didilikwa oomeme konima ngeenge va pulumuna hava ka ningila ounona vavo eedjapo domadalo koshipangelo shaShakati ile koipangelo ya ili li.
Oshipangelo shaMedi Park osho shimwe sha didilikwa shomoipangelo shopaumwene monooli hashi dalwa omwaalu muhapu ounona.
Omudo 2021 omwa lopotwa omwaalu wounona 811 va dalwa moshipangelo shaMedi Park, omudo 2022 ounona ova li 765 omanga neudo moule weemwedi hetatu omwa lopotwa ounona 528.
Moshipopiwa shaye omukulunhuwiliki koshikondo shokuyandja omaufemba mouministeli woikwameni Collens Muleke okwa ti ouministeli woikwameni neameno lokeengamba otau twikile nokuyandjeneka omayakulo moshiwana tashi pitile mokulongela kumwe nomahangano opaumwene.
Okwa ti elalakano lokueta omayakulo okuyandja eedjapo domadalo moMedi Park opo ku kelelwe ovakainhu vaha ye vali koipangelo ya yooloka tava kongela ounona eedjapo domadalo.
Okwa weda po yoo vali ta ti osha fimana ngeenge moshipangelo mu na ombelewa yokuyandja eedjapo domadalo kounona molwaashi otashi kwafele okaana ka mone odjapo yedalo pefimbo. Lopokati opo, Muleke okwa ti ombelewa yaye oya didilika eshongo linene lounona tava ka kongelwa eedjapo domadalo kwa laata, onghee okwa kumaida ovadali opo va kwashilipaleke kutya okaana oka mona odjapo yedalo pefimbo.
Okwa kumaida oshiwana shi twikile okulongela kumwe novanambelewa keembelewa dokuyandja omaufemba.
Efiku lepatulolo lombelewa, omudali Shuuveni Samuel oye umwe kwa li wotete okushangifa okaana kaye odjapo yedalo moshipangelo shaMedi Park.
Samuel okwa ti okwa pandula ouministeli woikwameni eshi wa eta ombelewa yokuyandja eedjapo domadalo kounona moshipangelo.
“Paife itatu ka konga vali eedjapo domadalo koipangelo yokokule noshoyo okukala momikweyo diledile,” ta ti.
fhamalwa@nepc.com.na