Oohekita dha adha po499 344 odha pya molwomapeya nuumvo okuza sho ethimbo lyomapeya lya tameke muApiilili. 

Momushangwa gwa pitithwa mEtitano, uuministeli womidhingoloko, omakuti nomatalelopo (MEFT) owa pula aakwashigwana, aanafaalama osho wo ooyene yomaliko opo ya tule po omalandulathano ngoka taga shunitha pohi ompito yomililo tadhi tukuka pethimbo ndika pokati kApiilili naSepetemba. 

Omukuluntupitithi gwomauyelele mombelewa yo-MEFT Romeo Muyunda okwa ti omapeya ohaga hanagula omaliko osho wo komudhingoloko uule woomvula dha pita. 

Okwa fatulula kutya omililo ngadhika ohadhi taandelithwa unene kombepo, uupyu oshowo omwiidhi gwa kukuta, shoka hashi eta omulilo gu fike tagu endelele unene. 

“Manga ethimbo lyomapeya inaali tameka, uuministeli owa li wa tula miilonga oshikonga shokushunitha pevi ompito yetaandelo lyomililo, sigo oompaka, ookilometa 33 odha li dha tulwa pamuthika gokukelela omundilo, oshilongo ashihe, niilonga mbyoka natango onkene tuu tayi tsikile,” Muyunda ta ti ngaaka. MEFT okwa pula wo aayunguli yomakala gokutema opo ya iyuthe komilandu ndhoka dha tulwa po kuuministeli mo2022. 

Uuministeli owa ti owa yambidhidha wo aakwashigwana sho taye ya pe omadheulo mokudhima omililo.- Nampa