Omudhani gwoCape Town City Teko Modise ota ka tsilika omakwa sho oshikakomumvo shokatanga kokoompadhi tashi tsu onkolo ehuliloshiwike ndika.
A talika ko koyendji onga omudhani dhingi gwomokati a dhanena oPSL, omulumentu nguka a tseyika nawa noshilukadhina General okwa li a gandja etumwalaka tali enditha omwenyo ndyoka lya li lya tulwa kepandja lyosipana lyosocial media. Modise okwa li a wayimine oCity oshikakomumvo shuudhano sha za ko konima sho a li a dhanene oMamelodi Sundowns, hoka a sindana oliha iikando iyali, ekopi lyoCAF Champions League noSuper Cup, osho wo omakopi goTelkom Knockout noNedbank Cup. Okwa sindana wo oMTN8 noCity kuyele moshikakomumvo shuudhano shika, shoka sha hala okutya okwa sindana omakopi agehe ngoka haga dhanwa koosipana dhomoliha ndjika yopombanda.
Modise okwa dhanena wo osipana yoOrlando Pirates noSupersport United nokwa dhanena wo osipana yopashigwana iikando yi vule 50, moka a kalela po oshilongo komakopi ngaashi FIFA Confederations  Cup, Ekopi lyuuyuni osho wo Ekopi lyiigwana yaAfrica.
“Sho nda yi kokapale komaidheulo nena osha li sha yooloka, nonando nda enda mondjila ndjoka handi ende shito. Sho nda thiki pokapale kanda li ndi shi ngele nandi yole, nandi imemehe nenge nandi lile. Onda kala aluhe nda hala okukala omudhani gwetanga.” Modise ta ti.
“Sho nda koko, onda li handi kala nda hala okukala nda fa Doctor Khumalo gwopethimbo lyetu. Onda kala ndi shi kutya esiku limwe shika otashi ka ningwa.” Modise ota kala kosipana ndjika moka ta ka longa iilonga yi ili.