Festus Hamalwa

Omulumenhu weedula 31 okwa kwatwa po konima eshi vati a ningila omukainhu waye nounona omatilifo kutya ote va dipaa. Otaku hokololwa kutya omulumenhu ou okwa kala nokuningila omatilifo ovaneumbo vaye kutya ote va dipaa unene tuu ngeenge a dja keendingosho.

Oshiningwanima eshi osha ningwa momukunda Ongoronongeyama moshitukulwa shaMusati.

Omukulunhu koshikondo shokukonakona oimbuluma mOmusati omupedukomufala Moses Simaho okwa hokolola ta ti omufekelwa okwa kala shito ha denge omukainhu waye neengonyo.

Vati Omaandaxa oshivike eshi omufekelwa okwa nukila omukainhu waye noku mu denga nomanghava. Naashi osha eta opo omukainhu a lopotele opolifi molwaashi okwa loloka okudengwa nokuningilwa omatilifo edipao komufekelwa.

Opolifi oya ti neudo momwedi Januali natango omufekelwa ou okwa li a kwatwa po mekwatafano loshibofa shokuhepeka omukainhu waye.

Oshiningwanima shikwao, ovalumenhu vavali ova kwatwa po konima eshi vati va denga okamatyona keedula 18 komukunda Onawa moshitukulwa shaMusati.

Opolifi oya hokolola tai ti ovalumenhu ava ova nukila okamatyona noku ka denga neengonyo fiyo taka di omukota.

Ovafekelwa otava pangulilwa oshibofa shonghendabala yedipao, nomakonakono opolifi otaa twikile.

– fhamalwa@nepc.com.na