Omukulunhu wopolifi moshitukulwa shaMusati Commissioner Titus Shikongo okwa ti ovakainhu, ounona voukadona nounona voumati ova ninga oihakanwa yokulongelwa oilonga youshada yopaixulo eshi ovanhu 19 va kwatwa onghonga neudo mOmusati.
Ovanhu va kwatwa onghonga omwa kwatelwa ovakainhu ovanamibia 15 nounona voumati vavali osho yoo omukainhu umwe womukwashiwana waAngola.
Shikongo okwa ti omwedi Febuluali oo unene u na omwaalu muhapu wovanhu va ninga oihakamwa yokukwatwa onghonga.
Edi oda popiwa kukomufala Shikongo eshi a ninga eenghundafana naKundana Etitatu, a ti ovafekelwa va kwata ovanhu keenghono omwa kwatelwa ovakwashiwana vaAngola vanhe va kwatwa po eshi va ningila ovakainhu oilonga youshada yopaixulo.
Okwa weda po ta ti omanga Ovanamibia ove li 11 navo va kwatwa po eshi va kwata ovanhu onghonga, mwa kwatelwa omukainhu umwe eshi ta fekelwa a kwata okaana kokamati keedula omuwoyi onghonga.
Shikongo okwa ti opolifi oya didilika oshiwana shi hole okulopota oibofa yomakwatonghonga kwa laata nale, onghee eshi ohashi longifa opolifi noudjuu opo i dule okuninga omakonakono diva.
“Ngeenge meefamili dimwe omwa ningwa oshibofa shekwatonghonga, eefamili dimwe ohadi kala manga tadi kundafana ngeenge otadi dulu tuu okulopta omukwapata wavo oo a kwata onghonga omunhu wepata lavo ile otava mwena. Naashi ohashi eta opo oibofa imwe yomakwatonghonga aa a ningwa pokati kovakwapata a kale a lopotwa kwa laata shaashi ovanhu ohava kala manga tava kondjifafana,” Shikongo ta ti.
Okwa ti shikwao vali ounona vamwe ile ovakainhu ohava ningilwa omatilifo konima ngeenge va kwatwa onghonga eshi hava kala va tila okupopya diva kutya ova kwatwa onghonga.
“Ovanhu nava lopote oibofa yomakwatonghonga pefimbo, ovanhu ngeenge ovanyengwa okufika kopolifi nava shivifile oovene vomikunda ile ovashiinda opo ouyelele u kale wa fika kopolifi diva yoo i dule okuninga omakonakono omeendelelo,” Shikongo ta ti.
Okwa kunghilila oshiwana opo shi xulife po okuyandja oilonga yomomaumbo kovalumenhu vehe shi kutya ova dja peni shaashi okwa didilikwa ovalumenhu vahapu konima ngeenge ova pewa oilonga meumbo mu na oukadona, ohava kwatwa komhepo yokukwatwa oukadona onghonga.
“Oshiwana nashi kale shi na eenomola dopolifi efimbo keshe, sho nashi manguluke okulopotela opolifi oimbuluma aishe,” Shikongo ta ti. – fhamalwa@nepc.com.na