Elelelo lodoolopa yaKeetmanshoop ola tameka okuteta ko omeva nolusheno keembelewa depangelo neengeshefa odo di na eengunga domayakulo amuni.

Meenghundafanaa a ya nodjonghundana yoNampa, omukulunhuwiliki wodoolopa Lee Mwemba okwa ti eteteko lomayakulo aa ola tameka Omaandaha oshivike eshi - nena otava yandje olopota ngee oshinima eshi tashi ende.

Mwemba ta ti fiyo opapa muni okwa teta ko omeva nolusheeno keengeshefa neembelewa di li 83.

“Eteteko eli otali twikile, nafiyo opapa (mEtitatu) otwe shi pondola okuongela po eemiliona N$13, notu wete kutya otatu ka hangwa twa ongela po shihapu eshi Etitano (nena) tali ka fika,” Mbemba ta ti. Okuyuka pexulilo laKotoba, muni okwa li a pa eengeshefa nomahangano fiyo efiku 03 Novemba opo va kale va futa eendjo davo nongeenge hasho, omayakulo avo otaa tetwa ko. 

Efimbo olo Mayola waKaiti McDonald Manse okwa tile eteteko eli otali ka ningwa momalweefo atatu oo taa ka tameka neengeshefa, omahangano, neembelewa dopapangelo.

Olweefo olutivali otali ka tameka momafiku 4 Deseba, naali otali ka talela po ovanambelewa nookansela vamuni, nolweefo olutitatu olo tali ka taalela ovakalimo aveshe koonono modoolopa, otali ka tameka petameko laJanuali.

Ovakalimo, oiputudilo yepangelo neengeshefa domoKeetmanshop ove na eendjo damuni, adishe kumwe eemilona N$212, molwoishoshela, oshoyo omayakulo amwe amuni inaa futwa. 

Elalakano lokuteta ko omayakulo okufininika ovakalimo va fute ko ku dule kwoongelwe oshimaliwa opo muni a dule okutwikila nokuyandja omayakulo kovakalimo.

Eembelewa delelo lopashitukulwa sha||Karas, eembelewa delongo, eembonge dopashitukulwa dopolifi, ombelewa yangoloneya, neembelewa douministeli wounamapya noshoyo ouministeli woikwameni, odo dimwe domoiputudilo oyo ya tetelwa ko omeva nolusheno kumuni. -Nampa