SAPIRAMA - Omulumenhu oo e liyandja kopolifi mEtivali konima yokudipaa omonakadona, okwa longela nale odolongo konima eshi a dipaele omukulukadi waye –oo oye ina yokaana oko tuu oko. 

Omunamido 55 wokomukunda Sapirama koKavango West onghelainya okwe li yandja kopolifi konima eshi a dipaa okamonakadona Isoni Maria Simbungu (17). Otaku hokololwa omulumenhu ou a twa okaanaa kaye nombele oikando itatu monhulo noikando ihapu molutu alishe. 

Edina laye itali dulu oku popiwa shaashi ina holoka natango momhangu. 

Otaku hokololwa omulumenhu ou a pitifwa mo modolongo momudo 2021, konima eshi a longela odolongo yomido donhumba molwaashi a dipaa imukainhu waye, ina younona vaye. 

“Eshi a dja mo ina ulika ngeno e na ouxwapindi, no ina eta mo oupyakadi momukunda omu, fiyo onena eshi a dipaela okaana kaye oipundjamenye. Nafye otwa kumwa shaashi ka twa li twa teelela oshinima eshi,” osho omukulunhu umwe womomukunda Paulus Malinus, oo e li yoo mushiinda shavo a hokolola. 

“Omulumenhu ou okwa dipaa okamonakadona. Ina pa kondjwa, ina pa tangunwa, ina pa ningwa sha… Okaana ohaka kala nomulumenhu wako, nongula inene oke uya keumbo ngaashi haka ningi shito. 

Xe okwe ka ifana konduda yaye ndele teka tu nombele oikando ya yooloka. 

Konima okwa dja mo meumbo, ta piti meumbo lange, noku ya kopolifi eke li yandja,” Malinus ta ti. 

Okwe mu twa twuvali mevele lokolulyo, nalumwe mevele lokolumosho. 

Okwe mu twa yoo kombuda monetundji, ndele te mu fiye opo a kangavala. 

Kasimba Haipanda, xe yomufekelwa oo yoo e li xekulu ya nakufya, okwa li a kofa pefimbo loshiningwanima. Kali e shi osho tashi li nyenge meumbo laye. 

“Ina ndi mona kutya ombele oyo a longifa okwe i kufa peni, ile oi li ngahelipi, onde uya ashike ndi lombwelwe ehokololo, naashi ndaka hondamena mo monduda, shili shili omutekulu wange omo nde mu hanga a kangavala. Ina ndi uda nande ngeno pe na oku ha udafana pokati kavo, ile ngeno pwali eenhangu shaashi ame onda li nda kofa,” Haipanda ta ti. 

Felip Haimbodi omulumenhu wa nakufya okwa hokolola kutya Simbungu okwa dja ko keumbo laye ongula inene ta ti otaka ya koNcaute. 

Ohaluka ota hangwa konghundana kutya okakadona kaye oka xulifa. “Keumbo letu okwa dja ko ongula lwopo 05h00 inene ta ti otaka pita keumbo (kooxekulu) ye a ka ye kumumwainakadona koNcaute va ti a ka longife oWi-Fi,” Haimbodi ta ti.