WINDHOEK- Opolisi moshitopolwa shaShikoto oyi li tayi konaakona oshipotha shoka tashi yemateke sho omulumentu gwepipi lyopokati a fumvike omonamati nomwenyo mepya e ta si.
Oshiningwanima shika osha hokololwa sha holoka mOlyomakaya gehuliloshiwike lya zi ko sha holokele momukunda gwedhina Onadhi moshikandjohogololo shOnankali moshitopolwa omo tuu moka.
Okwa hokololwa kutya nakuvala okanona hoka okwa yi megumbo moka ee ta kutha okanona hoka, te ka tula moshako ndele te ka fala mombila ndjoka a fula mepya noku ka filila mo sigo ka si .
Omulombo ngoka gu li mepeko lyopolisi ogwa hokolola kutya okanona hoka oka li ka falwa kuyina kooyinakulu (ngoka a vala he) mOlyomakaya ogo tuu ngoka nelalakano lyokukakala nayinakulu ngoka a vala he. Ihe omanga ina li konda omuthitu okanona hoka oka dhipagwa po kuhe. Epeko lyopolisi ndyoka inali gandja uuyelele wa gwana ngele yina yanakusa okwa li e li natango mekwatathano lyopaihole nahe yokanona nenge ahawe.
Nakusa ngoka a li a valwa e na uulema ita vulu okweenda okwa li e shiwike nedhina Josef Tuyenikumwe Nghuumbwavali gwomimvo mbali. He ngoka e mu vala oku na omimvo 26 nedhina lye itali vulu okutumbulwa oshoka ina holoka natango mompangu . Okwa tegelelwa okuholoka mompangu oshiwike shika.
Moshiningwanima sha yooloka kwaashoka omulumentu gwomimvo 54 okwa hokololwa a holoka mompangu konima sho a kwata okanona ke kokakadhona koonkondo. Oshiningwanima shika osha ningilwa kolukanda lwedhina Vostruisvlaakte moshikandjohogololo shaRehoboth. Osha ningwa nduno pokati kaDesemba 2010 naDesemba 2012, ashike omutamanekwa moshikumungu shika opo ashike a kwatwa po kopolisi mEtiyali lyoshiwike shika.
Okwa hokololwa kutya he yanakuningilwa omuyonena nguka oha kala ashike ta ka tala ko omunona nguka komagumbo goothigwa hoka a kala ta silwa oshimpwiyu ee te mu ningile nduno iilongo yuushadha, konima sho e mu uvanekele omagano nokutya epuko olyayina.
“Ngashingeyi oshipotha shika oshi li momakonaakono niipotha oyindji oya tegelelwa okugwedhwa ko komutamanekwa nguka ngele omakonaakono ga pu,” osho omukonaakoni gwopolisi omukuluntu Chief Inspector Simon Hauwanga a hokolola ngaaka.
Ngashingeyi okwa tulwa mondholongo moRehoboth nokwa tegelelwa a holoke mompangu muule woshiwike shika.