Opolifi moshitukulwa shaHangwena ot ai ningi omakonakono kombinga yoshitaashi shopolifi kOshikango konima eshi kwa lopotwa ovanadolongo have livake mokakuma. 

Omukulunhu koshikondo shokukonakona oimbuluma mOhangwena Omupedukomufala Zachariah Amakali okwa hokolola ta ti opolifi otai kongo omulumenhu weedula 42 e livaka modolongo Omaandaxa kOshikango. 

Otaku hokololwa omulumenhu ou a teta mombada yoipeleki nokutula omhadi ketako. 

Omulumenhu ou paife okwa ninga omafiku atatu ina monika. 

Amakali okwa yelifa ta ti omulumenhu ngaha paife okwe livaka modolongo lwoikando ivali molwaashi natango omudo wa dja ko okwa li e livaka modolongo kOshikango, nokwa ka hangwa kodoolopa yaSwakopumund a hondama. 

Omulumenhu ou vati okwa li a kwatwa po mekwatafano loshibofa shoumbudi wokuteya omaumbo lwoikando ya yooloka. 

Otaku hokololwa oshitaasi shopolifi kOshikango haku lopotwa ovanadolongo lwoikando ya yooloka tave livake mokakuma. 

Omudo wa dja ko koshitaasi shopolifi kOshikango okwa li kwa lopotwa natango ovalumenhu ve livaka modolongo va pitila pombada yoipeleki nokufaduka po va uka moAngola. 

Onghee Amakali okwa ti ombelewa yaye oye lipyakadila nokuninga omapekaapeko kombinga yonghalo yovanadolongo tave livake modolongo. 

Okwa ti ota indile moshiwana kwaau e na ouyelele kombinga yomufekelwa ou opo shi lopotele opolifi keshe i li popepi. 

-fhamalwa@nepc.com.na