Ignatius Nambundunga
Opolisi moKaribib oya manga po omulumentu omunamimvo 22 sho anuwa a li a longele aanona yatatu omuyonena gwopaihulo. Sha ikolelela kepeko lyopolisi, omulumentu nguka iilonga mbika yomuyonena okwe yi ninga iikando ya yoolokathana. Yaali yomaanona mbaka oye na omimvo heyali, nakakwawo komimvo hetatu. Omakonaakono gopolisi moshiningwanima shika otaga tsikile. Mondoolopa oyo tuu ndjoka yaKaribib, omwa holoka ishewe oshiningwanima shi ili, sho omulumentu gwomimvo 44 Werner Shipanga a li a si pethimbo ya li taya kondjo. Otaku popiwa kutya olugodhi olwa li lwa tukuka pokati komulumentu nguka naafekelwa yaali paandja gumwe gwomaafekelwa. Pampito mpaka, shoka sha etitha olugodhi nduka inashi tseyika. Opolisi tayi ti lutu lwaShipanga olwa tumwa koWalvis Bay opo lu ka ningilwe omakonakono. Aafekelwa yaali, aalumentu yomimvo 36 no29 oya li ya dhitikwa po noya li ya holoka mompangu yaMangestalata gwaKaribib ohela. Moshitopolwahogololo shaTjozondjupa momudhingoloko gwaTsumkwe, lwopotundi 01h00, omufekelwa gwoomvula 27 okwa li a mangwa po mekwatathano noshipotha shonkambadhala yedhipago. Otaku hokololwa omulumentu nakumangwapo a li a tsu omupambele gwe gwomimvo 27 nombele pethimbo ya li moontamanana. Anuwa oya li taya tamanana kutya pokati kawo yaali olye mwene gwekatana ndyoka lya li popepi nayo. Manga ye li mokati koontamanana, omufekelwa okwa kutha ombele e ta ponokele nokutsa mukawo iikando oyindji. Nakuponokelwa okwa li a ehamekwa montulo, kombunda osho wo mothingo nokwa li a falwa a ka mone uuhaku koshipangelo shepangelo shaGrootfontein. Omakonakono gomiya dhaShinana otaga tsikile.
Omulumentu gwoomvula 25 omukwashigwana gwaAngola okwa li a tulwa miipandeko mehuliloshiwike shi na sha noshipotha shekwato koonkondo lyokanona koomvula hetatu.
Oshiningwanima shika osha li sha holoka momukunda Omutsegwonime moshikandjohogololo shaNehale lyaMpingana, moshitopolwahogololo shaShikoto pethimbo lyoowili dhokomatango. Otaku hokololwa kutya okanona hoka ka ningi oshihakanwa nako Okaangola. Omulumentu nguka okwa holoka mompangu yaTsumeb ohela.
inambundunga@nepc.com.na