Omukulunhuwiliki mouministeli wouhaku nonghalo nawa Ben Nangombe ota ti oministeli youhaku oya limbililwa kounona vofikola tava kwatwa kombuto yoCovid-19.
Okwa ti unene tuu ovanafikola ovo vamwe va didilikwa va ninga oiyakanwa yombuto yoCovid-19 shaashi omwaalu wovanafikola vakwatwa kombuto otau ende wau ka pombada efiku keshe.
Pefimbo a ninga eenghundafana naKundana Omaandaxa Nangombe okwa popya ta ti oministeli onghee ngaa tai twikile nokulombwela oshiwana opo shi kale tashi liufa komilandu doCovid-19 efimbo keshe. Nangombe ota kungulile ovadali ile ovatekuli vounona opo va kale tava lombwele ounona vavo veli ufe komilandu doCovid-19 pefimbo ngeenge tava i kofikola.
“Ovanafikola ova pumbwa okupewa ouyelele kombinga nghee sha fimana okuliufa komalombwelo ombuto ei, shaashi eshi otashi kwafele okushunifa etandavelo loCovid-19 mokati kovanafikola pedu,” Nangombe ta ti.
Okwa popya ta ti ovakunhufikola na kale va kwashipaleka kutya eefikola davo odi na oikwafifo yokukelela ombuto ya wana, ngaashi eefewa, omasika nosho tuu ikwafifo ikwao.
“Omakende eengulu dofikola na kale a patuluka efimbo keshe ngeenge ovanafikola veli mongulufikola opo mu kale mwa ya omhepo, ovanafikola ina va pumbwa okukala vangudumana efimbo lile,” Nangombe ta ti.
Nangombe okwa denga omufindo ta ti ovanhu aveshe vena eedula da ufwa okukala va tunhilwa na va ye momwaalu munene va katunhilwe ombuto yoCovid-19 opo va kale veli amena. Okwa hokolola ta ti osha fimana ngeenge omunhu a tunhilwa shaashi oha kala e na omhito ili pedu yokukwatwa komukifi ou.
“Oshiwana na shi xulife po okutandaveleka ouyelele woipupulu kombinga yovenda yoCovid-19, shaashi eshi otashi ku fa ovanhu ohokwe yokukala va ka tunhilwa,” Nangombe ta ti.