Maurice Kambukwe
Enyakwa ekulu lyuuyuni moshiviha shoWorld Boxing Organisation (WBO) middleweight Lukas Ndofuluma okwa uvanekela aayambidhidhi ye okutula po uudhano wa kwata miiti sho ta ka taalela omutanzania moshiviha moka taya ka kondjela epaya lyo-WBO Africa, omanga Nathie Kakololo okwa li a popi kutya ota ka tula Lerato Dlamini miiyagaya sho taya ka lwa momasiku 8 Maalitsa moSouth Africa. MTC Salute Boxing Academy ohela oya li ya tseyitha aadhani yawo mbaka yaali kutya oya tegelelwa ya ka kondjele omapaya pokati kaMaaalitsa naApiilili.
Pethimbo ta gandja omulombo kiikundaneki poombonge oonene dhoMTC mOlympia mondingandinga yoshilandopangelo, okalaba ndjika oya li ya popi kutya Nathie Kakokololo ota ka taalela omuSouth Africa Dlamini, omanga Ndafolumu ‘The Demolisher’ ta ka taalela Meshack Mwankemwa gwaTanzania momasiku 11 Apiilili koCountry Club moWindhoek. Uudhano pokati kaKakololo naDlamini otawu ka kala moEast London moSouth Africa.
Ta popi niikundaneki, omudheuli koSalute Boxing Armas Shivute Armas okwa ti oya itaala okukondjitha Dlamini oshoka ke shi naanaa omudhingu ngaashi Kakololo.
“Onda nyanyukwa okutseyitha kutya omubokisi gwetu Nathie Kakololo ota ka lwa moSouth Africa momasiku 8 Maalitsa naLerato Dlamini ngoka oye enyakwa lyoWBC, naangoka kandi wete e vule Kakololo. Sho osho twa itaala uudhano wu ye komeho,” Armas ta ti ngaaka.
Uudhano uunene pokati kaNdafoluma naMwankemwa otamu ka kala wo aadhengingonyo yalwe yomoshilongo sho omunamimvo 35 nguka ta ka kondjela epaya ndyoka kaali na mwene lyoWBO Africa.
Kakololo okwa ti okwa kala nokwiilongekidha uule wethimbo ngashiingeyi nota ka za ko nepaya ndyoka ta ka kondjela.
“Onda nyakukwa nonda ilongekidha oshoka tse aabokisi otwa fa aakwiita, otwa pyakudhukwa ethimbo kehe. Onda kala nokwiidheula uule wethimbo naashi tashi ke ya muudhano mbuka, otandi ku uvanekele kutya ito ka mona omuntu ngoka sho tatu ka tsakanena. Otandi ka za ko nepaya lye,” Kakoklolo ta ti ngaaka nomukumo.Ndafoluma ta ti wo naye okwa nyakukwa sho ta ka dhana uudhano mbuka noku li komalwilo nale nokuli.
“Onda pandula osipana yandje sho ya eta olugodhi nduka, onda kala aluhe nda hala okukondjela epaya ndyoka, nethimbo lyandje ondi wete kutya olya thikana,” Olugodhi nduka otalu ka luwa kohi yotema ‘It’s the Demolisher’s time’ naasho a popi Ndafoluma okwa ti ka li e shi tegelela uudhano wu kale kohi yotema ndjoka.
‘Onda li nda kumwa kotema yuudhano mbuka, notandi uvaneke kutya otandi ka sindana. Otandi ka ulika oshitalenti shankje,” osho a gwedha ko ngaaka a ngungummana.
Ndofoluma okwa dhana uudhano 21, a sindana 17 nokudhengwa utatu omanga Omutanzania ngoka gwoomvula 23 a dhana omaudhano 29, a sindana iikando 20, a dhana shi thike pamwe lwaali nokudhengwa luheyali.
Uusiku owo tuu mboka, Alpheus Shilongo ota ka taalela Simeone Shafodino moshiviha shomiddleweight shomadhingoloko gahamano omanga Berhard Benhard ta taalele Tangi Shapwa Walterweight momadhingoloko gane.
Moshiviha shoJunior Welterweight shomadhingoloko gahetatu, Albinus Felasiano ota ka taalela Salimu Chazama gwaMalawi. Kasera Sirongo ota ka taalela Omuzimbabwe Simeon Madhanire muudhano womadhingoloko gahamano moshiviha shoheavyweight.
Anthony Jarmann ota ya kuthathana po naLimbani Masamba gwaMalawi moshiviha shoMiddleweight shomadhingoloko gahetatu.
Omanga John Munee, Jonas Erastus, Lazarus Namalambo naSimon Johannes opo taya kongelwa aakondjithi natangao.